Pervia dal svelt augment dal dumber da persunas infectadas cun il coronavirus sco er pervia da las mesiras ch'il Cussegl federal ha decretà ils 28 d'october 2020 per cumbatter cunter la pandemia da COVID-19, ha la Regenza designà la situaziun en il chantun sco situaziun speziala.
En l'entira Svizra s'augmenta rasantamain il dumber da persunas infectadas cun il coronavirus (COVID-19). Pervia da quest svilup ha il Cussegl federal concludì ils 28 d'october 2020 ulteriuras mesiras che restrenschan supplementarmain la vita publica. Il Cussegl federal è cumpetent da decretar questas mesiras perquai che la situaziun vegn designada sco situaziun speziala sin basa da la Lescha federala davart il cumbat cunter malsognas transmissiblas da l'uman (Lescha d'epidemias). Er en il chantun Grischun è il dumber da persunas infectadas cun il coronavirus puspè creschì fermamain. Ord vista directiva pari inditgà a la Regenza da designar la situaziun – sin basa da la Lescha davart la protecziun da la populaziun – sco situaziun speziala.
Garantir in proceder unitar en il chantun ed integrar las vischnancas
Il dumber da cas en il chantun mussa cleramain ch'il dumber da las persunas infectadas cun il coronavirus s'augmenta sur las regiuns ora. La designaziun da la situaziun speziala garantescha per l'ina in proceder unitar sin plaun chantunal e permetta per l'autra da prender mesiras adequatas sin plaun local u regiunal, sch'il dumber da cas crescha svelt. Correspundentamain ston las vischnancas pia mobilisar lur stabs directivs communals.
La direcziun ha l'Uffizi da sanadad
L'Uffizi da sanadad surpiglia la direcziun en il cumbat cunter la pandemia da COVID-19. A favur da las vischnancas vegn el a preparar in catalog da mesiras supplementaras per limitar – sin plaun local u regiunal – sistematicamain in svelt augment da las infecziuns cun il virus. Las vischnancas pon prender questas mesiras en cas da basegn, suenter avair consultà e suenter esser sa cunvegnidas cun l'Uffizi da sanadad.
Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
Gremi: Departament da giustia, segirezza e sanadad
Funtauna: rg Departament da giustia, segirezza e sanadad