La fin da l'emna passada ha la surveglianza da chatscha sajettà in luf ibrid supponì en la Val dal Rain da Cuira. Differents indizis mussan ch'il mastgel – che ha in pail besch fitg marcant – pudess esser immigrà dal Piemunt tras il Tessin en il Grischun. L'analisa genetica è vegnida instradada. Las enconuschientschas da quella vegnan previsiblamain ad esser avant maun il matg.

La fin da december 2021 è il chantun vegnì infurmà ch'i dettia mussaments d'in ibrid da luf e chaun cun in pail besch en la vischinanza da Domodossola. Tant la cumparsa extraordinariamain clera sco er la successiun territoriala da las cumprovas da quest animal èn stadas – tenor las infurmaziuns da l'Italia – ferms indizis ch'i dastgass sa tractar d'in descendent d'ina cruschada da luf e chaun ch'è emigrà da la regiun Alessandria en il Piemunt. En il decurs dal schaner hai dà singulas cumprovas da l'ibrid supponì en la vischinanza da Domodossola e pli tard en il Tessin. Durant las emnas passadas han ins lura survegnì infurmaziuns che l'animal sa chattia en la Val dal Rain da Cuira.

La legislaziun federala da chatscha prevesa da sajettar cas da suspect d'animals ibrids
Ord vista da la protecziun da las spezias èsi impurtant ch'ils animals ibrids vegnian sajettads, per ch'els na possian betg sa reproducir. Cas cuntrari pudess quai avair consequenzas negativas a lunga vista per la populaziun da lufs. Tenor la legislaziun federala da chatscha ston ibrids supponids perquai vegnir sajettads da las autoritads executivas chantunalas en cas da suspect motivads. 

L'animal ch'è vegnì sajettà l'emna passada è in mastgel da vegliadetgna anc nunenconuschenta. In'emprova da DNA da l'animal vegn ussa analisada geneticamain al Laboratori da biologia da conservaziun da l'Universitad da Losanna. L'ibrid supponì è vegnì sajettà da la surveglianza da chatscha en enclegientscha cun l'Uffizi federal d'ambient.

Infurmaziuns:

Responsabladad: Uffizi da chatscha e pestga