Onn per onn impundan ils manaschis forestals publics e las interpresas forestalas fitg blera lavur per tgirar il guaud grischun. En il focus stattan la tgira dal guaud da protecziun e la promoziun da la biodiversitad forestala. Er l'onn 2021 han las lavurantas ed ils lavurants da guaud ademplì lur incumbensas impurtantas, per ch'il guaud satisfetschia a las differentas pretensiuns da la societad e dumognia las sfidas da la midada dal clima.

Ils ultims 10 onns han ils manaschis forestals publics e las interpresas forestalas tgirà en media 3800 hectaras guaud per onn. L'onn 2021 è vegnida tgirada ina surfatscha in pau pli pitschna da totalmain 3400 hectaras. Quai èn 1,5 pertschient da la surfatscha totala dal guaud da 210 000 hectaras. La tgira vegn fatga tenor ils princips da la persistenza e da la selvicultura natirala.

Nagins effects significativs dals pretschs da laina sin la quantitad da la laina racoltada
Tenor quests princips pon vegnir racoltads mintga onn maximalmain 390 000 meters cubic laina. Sco gia dapi l'onn 2016 n'è quest contingent betg vegnì exaurì. L'onn 2021 èn vegnids racoltads totalmain 340 000 meters cubic laina en il guaud grischun. Quai correspunda a l'utilisaziun dals onns passads e mussa che l'augment dals pretschs da laina n'ha gì anc nagina influenza sin la quantitad da la laina racoltada. La quantitad da la laina che n'è betg vegnida prelevada dal guaud pervia d'activitads forestalas, mabain en consequenza da donns, è stada l'onn 2021 – cun 16 pertschient – massivamain pli bassa che l'onn 2020 (40 pertschient). Quai è d'attribuir a l'aura bletscha e fraida durant la primavaira e la stad, uschia ch'ils baus-scorsa n'han betg pudì sa multiplitgar uschè bain.

La surfatscha dals guauds da protecziun tgirads resta constanta
La tgira dals guauds da protecziun stat en il focus da las activitads forestalas. In guaud stabil e saun è la meglra protecziun ed er la pli favuraivla cunter privels da la natira. L'onn passà èn vegnidas tgiradas circa 2400 da las var 122 000 hectaras guaud da protecziun en il Grischun. L'onn 2021 è pia vegnida tractada ina surfatscha che sa chatta en la media dals onns passads. Per 1600 da las 2400 hectaras tgiradas han las proprietarias ed ils proprietaris da guaud pudì profitar l'onn 2021 da contribuziuns federalas e chantunalas en l'autezza da 12,3 milliuns francs.

Biodiversitad e cultivaziun da guauds difficilmain accessibels
L'onn 2021 èn vegnidas tractadas var 400 hectaras guaud da biodiversitad. Latiers tutgan en spezial mesiras a favur dals cots e da las giaglinas da taus. Passa in terz da la populaziun da cots e da giaglinas da taus da la Svizra viva en il Grischun. Per trair a niz en moda persistenta il potenzial da la laina vegn ultra da quai realisà in program «Crana a cabel a lunga distanza/crana a cabel», e quai er en territoris cun gronds custs da racolta. Grazia a questa categoria da project èn vegnids racoltads supplementarmain 30 000 meters cubic laina. Questa quantitad correspunda circa a 10 pertschient da tut la laina racoltada en il chantun Grischun. Cun realisar quest project vegnan resguardads er ils interess da la protecziun da la natira.

Tgirar il guaud giuven en vista ad in guaud persistent
Ordaifer il guaud da protecziun han ins tgirà 180 hectaras guaud giuven e pia furmà la cumposiziun da las spezias da bostgs. En connex cun la midada dal clima èsi impurtant da dar ina structura multifara al guaud grischun. Cun las dretgas cumposiziuns da spezias da bostgs èsi pussaivel da minimar las ristgas e d'augmentar la resistenza dals guauds envers ils privels da la natira.

Infurmaziuns:

• Urban Maissen, selvicultur chantunal, Uffizi da guaud e privels da la natira, tel. +41 81 257 38 51 (cuntanschibel da las 10.00 fin las 12.00), e-mail Urban.Maissen@awn.gr.ch
• Riet Gordon,manader dal sectur Planisaziun dal guaud e reviers forestals, Uffizi da guaud e privels da la natira, tel. +41 81 257 38 55 (cuntanschibel da las 10.00 fin las 12.00), e-mail Riet.Gordon@awn.gr.ch

Responsabladad: Uffizi da guaud e privels da la natira