Cun ina preschentaziun variada mussa l'Uffizi da militar e da protecziun civila oz las pussaivladads multifaras d'utilisar il nov stabiliment d'exercizi en il Meiersboden da Cuira (vischnanca da Churwalden). Bain è la construcziun dal stabiliment d'exercizi en il Meiersboden gia terminada dapi il november 2021, pervia da la pandemia da COVID-19 n'è ina inauguraziun uffiziala fin ussa betg stada pussaivla.
Il nov stabiliment per exercizis e scolaziuns dal servetsch da protecziun civila han ins prendì en funcziun il november 2021 suenter in temp da construcziun da circa 4 mais. Dapi lura serva el sco lieu da scolaziun per diversas funcziuns da la protecziun civila dal chantun Grischun, uschia per exempel per ils piuniers, per il sustegn da la direcziun u per il salvament en profunditads. Access al stabiliment han er las organisaziuns partenarias sco l'armada, la Societad svizra per chauns d'encurir e da salvament (REDOG), l'Assicuranza d'edifizis (GVG), divers corps da polizia, ma er interpresas privatas en il sectur da la protecziun cunter crudadas e firmas sumegliantas.
Correspundentamain èsi pussaivel da prender en locaziun il stabiliment. Quel cumpiglia ina tur d'exercizi da quatter plauns, gallarias, hallas d'exercizi, in percurs da bastuns, cabinas d'incendi ed ulteriurs posts. Ils custs da construcziun dal stabiliment han importà circa 2 milliuns francs.
Agiunta:
Prescripziuns detagliadas per l'utilisaziun dal stabiliment da scolaziun
Fotografias agiuntadas:
Foto 2 | Foto 3 | Foto 4 | Foto 5
Infurmaziuns:
Armin Gartmann, manader dal sectur Acziun/instrucziun, Uffizi da militar e da protecziun civila, tel. +41 81 257 35 49, e‑mail Armin.Gartmann@amz.gr.ch
Responsabladad: Uffizi da militar e da protecziun civila