La Regenza renovescha l'incarica da prestaziun cun l'uniun Grischun Vacanzas per ils onns 2023 fin 2026. La contribuziun chantunala annuala per las prestaziuns da basa vegn augmentada da 6 milliuns francs sin 6,5 milliuns francs. Ultra da quai conceda la Regenza ina contribuziun chantunala dad 1 milliun francs per onn per realisar la «internaziunalisaziun».

L'augment da la contribuziun chantunala per las prestaziuns da basa da Grischun Vacanzas stat en connex cun la preschentaziun planisada sin il martgà da la Svizra franzosa e cun l'installaziun d'in post da project per la persistenza. En vista a las grondas sfidas turisticas da l'ultim temp (pandemia dal coronavirus, guerra da l'Ucraina) ma er en connex cun la midada dal clima e cun las aspectativas dals giasts areguard la persistenza da las purschidas turisticas beneventa la Regenza in'extensiun adequata da las activitads da Grischun Vacanzas a favur dal turissem grischun. Ultra da quai ha Grischun Vacanzas vinavant en mira da diversifitgar e d'internaziunalisar il turissem grischun. Per quest intent èsi necessari da far stentas concretas per augmentar l'enconuschientscha dal Grischun sin martgads creschents sco ils Stadis dal Golf, ils Stadis Unids da l'America e l'Asia.
Areguard las plazzas da lavur ed areguard la valurisaziun vala il turissem vinavant sco ina da las pitgas las pli impurtantas da l'economia publica dal Grischun. L'augment da la cumpetitivitad dal turissem grischun en la cumparegliaziun internaziunala sco er il rinforzament da la forza innovativa da l'economia turistica ha er en l'avegnir ina fitg gronda impurtanza.

©Grischun Vacanzas

La Regenza ha approvà la segunda fasa dal project «Engrondiment dal spazi» da la fundaziun Scola-dimora Cuira. Uschia garantescha ella a medem temp ina contribuziun chantunala da maximalmain 1,556 milliuns francs a la fundaziun per la sanaziun totala da la Scola-dimora Cuira.

Il schaner 2019 aveva la Regenza approvà la dumonda da la fundaziun Scola-dimora Cuira per l'emprima fasa dal project (communicaziun da la Regenza dals 10 da schaner 2019). La basa da finanziaziun per quest project da construcziun furman la Lescha da scola sco er la Lescha d'integraziun da persunas cun impediments. En il rom da la segunda fasa dal project vegnan tranter auter transferidas las structuras dal di e vegnan stgaffidas ulteriuras chombras singulas sco er engrondidas las localitads per l'alimentaziun.

©Anja Sturzenegger