La via da Samignun è ina part impurtanta da la rait chantunala da vias da colliaziun. Davent da Vinadi renda ella accessibla la vischnanca da Samignun ed è uschia l'unica colliaziun da traffic sin territori svizzer. En il rom da la sanaziun da la via da Samignun è ussa vegnì perfurà il tunnel Val Alpetta da 630 meters lunghezza.

In term impurtant da la construcziun dal segund da tut en tut quatter tunnels è cuntanschì: oz a las 10.00 è vegnì perfurà il tunnel Val Alpetta. Ils ultims dus tunnels Val Cotschna e Val Mundin suondan ils proxims onns.

Las lavurs da construcziun van tenor plan
Il 1. da settember 2021, cun l'emprima siglientada, han cumenzà las lavurs principalas vi dal tunnel. Oz è el vegnì perfurà, uschia che las lavurs d'exchavaziun èn terminadas. L'onn 2023 suondan la construcziun da l'interiur, dal portal ost e da la staziun da trafo al vest dal tunnel sco er dals mirs da sustegn. Il mir da sustegn ed il portal al vest dal tunnel èn vegnids terminads gia quest onn.

Las lavurs vi dal project da 28,6 milliuns francs n'han chaschunà nagins problems, uschia ch'ins ha pudì observar ils termins sco er ils custs. L'Uffizi da construcziun bassa ha buna speranza da pudair endrizzar il cumenzament da l'onn 2024 las installaziuns da manaschi e da segirezza e da pudair surdar il tunnel la stad 2024 al traffic. Suenter ch'il nov tunnel è en funcziun, vegnan prendidas per mauns las lavurs da demontascha e da renatiralisaziun dal traject actual.

La terza da las quatter etappas planisadas, numnadamain il tunnel Val Cotschna, è gia oz en la fasa da projectaziun. Las lavurs da construcziun duain cumenzar suenter l'avertura dal tunnel Val Alpetta.

Pretensiuns cumplexas al project
En tut il sectur dal project, en spezial sin il traject dal tunnel da via existent, è la via fitg stretga e na correspunda betg pli a las pretensiuns d'ozendi. Ultra da quai è la via exposta a numerus privels da la natira. Durant l'enviern sto la via perquai adina puspè vegnir serrada durant plirs dis pervia dal privel da lavinas. Grazia al nov tunnel Val Alpetta vegn la situaziun actuala meglierada. Ina ladezza dal vial da 5,8 meters ed in'autezza da 4,5 meters pussibiliteschan da charrar tras il tunnel en il futur en omaduas direcziuns. Tras quai vegn optimada decisivamain la circulaziun dal traffic – particularmain er per vehichels dal traffic public – ed augmentada considerablamain la segirezza da tut las participantas e da tut ils participants dal traffic.

Agiunta:

Fegl d'infurmaziun da l'Uffizi da construcziun bassa (settember 2021)

Fotografias agiuntadas:

Perfuraziun dal tunnel Val Alpetta

Portal ost dal tunnel Val Alpetta

Installaziun da las emprimas mesiras da segirada suenter ina siglientada

Infurmaziuns:

• Dr. Mario Cavigelli, cusseglier guvernativ, Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch
• Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01, e‑mail Reto.Knuchel@tba.gr.ch

Responsabladad: Uffizi da construcziun bassa