En connex cun la bova da l'onn 2017 al Piz Cengalo cuntinuescha la Procura publica dal Grischun cun la procedura penala. La procedura sa drizza cunter duas persunas ch'èn engaschadas tar l'administraziun chantunala sco er cunter ina persuna che lavurava per incumbensa dal chantun Grischun. Per las persunas pertutgadas vala la presumziun d'innocenza.
«Las consequenzas da la bova èn engrevgiantas tant per ils confamigliars da las otg victimas sco er per ils collavuraturs pertutgads», di Urban Maissen, manader da l'Uffizi da guaud e privels da la natira. «Nus stain mal per ils survivents che han pers lur confamigliars en la bova.» L'administraziun chantunala ha in grond interess che la procedura avanzia svelt e portia clerezza per tut las persunas pertutgadas. Per quest intent vegn ella a porscher il sustegn necessari.
La responsabladad per la procedura sco er la communicaziun èn chaussa da la Procura publica dal Grischun; i sa tracta d'ina procedura currenta. Ultra dal cuntegn da questa communicaziun a las medias na vegnan l'Uffizi da guaud e privels da la natira ed il departament responsabel perquai a dar naginas infurmaziuns supplementaras davart l'object da la procedura penala.
Infurmaziuns generalas
Ils 23 d'avust 2017 è vegnida giu ina bova en la Val Bondasca al Piz Cengalo, che ha manà a val 3 milliuns meters cubic grip. Otg umans han pers lur vita en questa bova. Suenter che la Procura publica dal Grischun aveva sistì l'onn 2019 las inquisiziuns penalas, han ils survivents inoltrà in recurs e tratg vinavant il cas fin davant il Tribunal federal. Il Tribunal federal ha approvà il recurs. La Procura publica dal Grischun cuntinuescha ussa cun la procedura penala. Fin che la sentenzia cun vigur legala è avant maun, vala per tut las persunas participadas la presumziun d'innocenza.
Persuna da contact per dumondas dal cuntegn, che servan a la chapaivladad:
Urban Maissen, selvicultur chantunal, manader da l'Uffizi da guaud e privels da la natira dal Grischun, e‑mail Urban.Maissen@awn.gr.ch (naginas infurmaziuns per telefon)
Responsabladad: Uffizi da guaud e privels da la natira