Tranter Vinadi ed il cunfin naziunal reparescha l'Uffizi da construcziun bassa dal Grischun la via d'Engiadina ch'è vegnida donnegiada ils 23 da december 2023 tras ina crudada da grippa. In sviament è endrizzà.
Avant ch'igl è pussaivel da cumenzar cun las lavurs da reparaziun, disfa l'Uffizi da construcziun bassa dal Grischun (UCB) in imposant bloc grond da circa 1500 meters cubic ch'è labil, quai per garantir la segirezza dals lavurants sin via. Quest bloc sa chatta var 40 meters sur la via d'Engiadina. Tras la crudada da grippa dals 23 da december 2023 è el per part vegnì a la surfatscha.
Sviament dals 30 d'avrigl fin ils 17 da matg 2024
Durant las lavurs da disfar e da rumir successivas sin la via d'Engiadina vegn svià tut il traffic, e quai a partir da mardi, ils 30 d'avrigl 2024 a las 07.00, fin probablamain venderdi, ils 17 da matg 2024. L'access a Samignun sur la via da Samignun n'è betg pertutgà da las lavurs.
La via d'Engiadina è serrada tranter Martina ed il cunfin naziunal. In sviament sur Danuder e Fuond è signalisà. Il sviament maina sur la via da Martina vers Danuder e vinavant sur la via dal Reschen a Fuond. La via da velos per lung da l'En (ruta 65) resta serrada per tut il traffic. Per motivs da segirezza na pon peduns e ciclists betg passar il plazzal.
Fotografias agiuntadas:
Fotografia 1: Il UCB disfa in bloc grond da circa 1500 meters cubic.
Fotografia 2: Pervia da la crudada da grippa dals 23 da december 2023 sto la via d'Engiadina vegnir reparada.
Infurmaziuns:
Rafael da Silva, schef dal district 4 Scuol, Uffizi da construcziun bassa, tel. +41 81 257 69 57 (cuntanschibel ils 29-04-2024 da las 08.00 fin las 12.00 ubain ils 30-04-2024 da las 08.00 fin las 11.00), e‑mail Rafael.DaSilva@tba.gr.ch
Responsabladad: Uffizi da construcziun bassa