Cun la midada da l'urari mez december 2025 vegn meglierada la purschida dal traffic public en il Grischun ed uschia augmentada la capacitad da transport en il chantun. A partir dals 23 da matg fin ils 9 da zercladur 2025 è il sboz da l'urari per l'onn proxim en consultaziun.
Suenter ch'il tact da mes'ura ha pudì vegnir realisà en l'urari 2025 per Cuira – Son Gagl (da mes'ura cun midar a Sargans), porschan las Viafiers federalas svizras (VFF) – a partir da la midada d'urari 2026 – il tact da mes'ura nuninterrut er per l'InterCity 3 svelt sin il traject Cuira – Turitg. Differentas novas colliaziuns d'apport la damaun baud e la saira permettan l'access a questas novas colliaziuns. Las regiuns dal chantun Grischun vegnan uschia colliadas anc meglier cun il traffic a gronda distanza durant las uras marginalas.
Tact da mes'ura Cuira – Glion e nov concept da bus en Surselva
In ulteriur term impurtant l'onn proxim vegn ad esser l'introducziun dal tact da mes'ura da la Viafier retica (VR) sin il traject Cuira – Glion. Ensemen cun quest tact da mes'ura èsi er previs d'augmentar las colliaziuns d'auto da posta en Surselva. A medem temp vegni a dar meglras e pli sveltas colliaziuns tranter las valladas da la Surselva. La populaziun ed ils giasts profitan uschia da pussaivladads da viagiar pli frequentas e da bunas colliaziuns.
Sistematisaziun da la viafier S Cuira
Las novas purschidas da la Viafier retica pretendan ina sistematisaziun, in tact da mes'ura da la viafier S da Cuira. Uschia vegnan meglieradas e stabilisadas en spezial las colliaziuns tranter la viafier ed il bus. En quest connex ston las uras da partenza e la politica da fermada vegnir adattadas en tscherts puncts, e la fermada a Haldenstein sto crudar davent. Durant las uras da grond traffic è previs in concept substitutiv cun bus.
Augments dal tact en las regiuns turisticas
Perquai che la dumonda en il traffic da temp liber è s'augmentada fermamain, vegni correspundentamain a dar dapli colliaziuns durant la stagiun principala. Previsas èn quellas en l'Engiadina Bassa sco er tranter Churwalden e Lai. Ultra da quai èn medemamain previsas dapli colliaziuns mintgamai la saira tranter Cuira e Flem/Laax.
Novas colliaziuns vers sid
En il corridor per l'Italia planiseschan las VFF davent da Bellinzona in'extensiun pass per pass pli gronda da la purschida. En tscherts puncts vegnan perquai purschidas colliaziuns supplementaras al bus express Cuira – Bellinzona. Medemamain vegn augmentà il dumber da bus express tranter Poschiavo e Samedan e pia la capacitad sin quest corridor.
Consultaziun publica
Ils sbozs da l'urari per l'onn 2026 èn exponids publicamain a partir da venderdi, ils 23 da matg 2025 sin www.oev-info.ch. Il chantun Grischun als ha elavurà durant ils ultims mais en stretga collavuraziun cun las interpresas da transport e cun las regiuns. Tut las persunas interessadas han la pussaivladad d'inoltrar ina posiziun. La consultaziun dura fin ils 9 da zercladur 2025. Ulteriuras infurmaziuns concernent la procedura d'urari chattais Vus sut www.aev.gr.ch/fahrplan. Propostas per l'urari pon da nov vegnir inoltradas facilmain sur il e-portal dal chantun Grischun. Las decisiuns, tgeninas da questas amplificaziuns da l'urari planisadas che pon vegnir realisadas e finanziadas, vegnan prendidas l'atun 2025. La midada da l'urari ha lura lieu ils 14 da december 2025.
Agiunta:
Las adattaziuns da l'urari
Sin las suandantas paginas figureschan detagliadamain las adattaziuns da l'urari da tut las lingias dal traffic public dal chantun Grischun ch'èn publitgadas en il sboz da l'urari.
Infurmaziuns:
Thierry Müller, manader da la partiziun Traffic public, Uffizi d'energia e da traffic, tel. +41 81 257 36 04 (cuntanschibel da las 10.00 fin las 12.00), e‑mail Thierry.Mueller@aev.gr.ch
Responsabladad: Uffizi d'energia e da traffic