Cun l'introducziun da l'applicaziun online «MIRA» ha l'Uffizi per la scola populara ed il sport digitalisà process en la psicologia da scola ed en la pedagogia speziala, ch'eran fin ussa sin palpiri. L'annunzia sco er l'elavuraziun dals dossiers en quests secturs èn ussa pli effizients.
La nova applicaziun online «MIRA» è accessibla sin la pagina d'internet da l'Uffizi per la scola populara ed il sport (USS). L'annunzia per ina cussegliaziun psicologica da scola u per dumondas en il sectur da la pedagogia speziala è concepida uschia, che la persuna che fa l'annunzia vegn manada pass per pass tras il process. Las indicaziuns vegnan segiradas digitalmain ed en moda protegida en la banca da datas da «MIRA». Ils documents che sa refereschan ad in cas pon pia vegnir creads, elavurads e cumplettads directamain en la banca da datas.
Contact ussa er digital
Entrar en contact cun il Servetsch psicologic da scola pon ins ussa sur l'applicaziun online «MIRA». Ella è vegnida concepida uschia, che las persunas responsablas per l'educaziun, uffants e giuvenils, las persunas d'instrucziun da tut ils stgalims sco er autras persunas spezialisadas pon s'annunziar. Per las persunas responsablas per l'educaziun èsi pussaivel da s'annunziar independentamain da la scola per ina cussegliaziun tar il Servetsch psicologic da scola. Ils uffants e giuvenils survegnan cun «MIRA» in'ulteriura pussaivladad da sa drizzar independentamain cun lur dumondas ad ina psicologa u in psicolog da scola. «Cun MIRA è vegnì realisà in project da digitalisaziun impurtant che pussibilitescha novas furmas da contact e che meglierescha ils process da lavur», di Chantal Marti-Müller, la manadra da l'Uffizi d'economia publica e sport.
La gestiun dals cas daventa pli effizienta
Ils champs da lavur e las incumbensas dal Servetsch psicologic da scola resp. dal sectur Pedagogia speziala / integraziun restan ils medems er cun «MIRA». Grazia a la digitalisaziun sa cumpletteschan ils process tranter las differentas partiziuns dal USS ed autras persunas spezialisadas directamain. Tras quai crodan pass da lavur d'enfin ussa davent, sco per exempel copiar documents u als surdar fisicamain. Tut las infurmaziuns èn disponibels en ina funtauna e da tut temp.
Applicaziuns online «MIRA»: https://mira.gr.ch/
Infurmaziuns:
Dr. Chantal Marti-Müller, manadra da l'Uffizi per la scola populara ed il sport, tel. +41 81 257 27 50 (cuntanschibla da las 15.00 fin las 16.00), e‑mail Chantal.Marti@avs.gr.ch
Responsabladad: Uffizi per la scola populara ed il sport