La Regenza grischuna ha nominà Linus Wild sco nov manader da l'Uffizi per il svilup dal territori dal Grischun. El vegn a surpigliar questa funcziun il 1. d'avrigl 2026.

Linus Wild che ha 43 onns, è creschì si en l'Allgäu ed ha frequentà il gimnasi tecnic a Leutkirch. L'onn 2007, suenter ses studi da diplom en planisaziun urbana a la Scola auta per economia ed ambient a Nürtingen, è el vegnì en Svizra, en il Grischun, ed ha cumenzà ina plazza sco planisader cirquital tar l'Uffizi per il svilup dal territori dal Grischun.

Suenter circa 9 onns tar l'uffizi ha Linus Wild surpiglià la direcziun dal team da planisaders dal circul nord, che s'occupa dal svilup dal territori en la Val dal Rain Grischuna, en il Scanvetg ed en la Surselva. Ils onns 2016 fin 2018 ha el absolvì – cumplementarmain a la professiun – in studi da master en filosofia, politica ed economia a l'Universitad Ludwig-Maximilian a Minca. Dapi il 1. da fanadur 2022 è el substitut dal manader da l'uffizi e maina la partiziun «Planisaziun d'utilisaziun ed edifizis ordaifer la zona da construcziun».

Linus Wild daventa successur da Richard Atzmüller, che dat giu la direcziun da l'uffizi sin agen giavisch per la fin da mars 2026. Sco ch'il chantun ha communitgà ils 16 da schaner 2025, surpiglia Richard Atzmüller – en il rom d'in «model d'artg» – in'autra funcziun en l'uffizi.

L'Uffizi per il svilup dal territori è in post da servetsch dal Departament d'economia publica e fatgs socials (DES) e presta ina contribuziun decisiva per in svilup persistent ed orientà als basegns dal spazi da viver sco er dal spazi economic e da la natira en il chantun Grischun. En il rom da las prescripziuns federalas elavura el la basa da la planisaziun dal territori ed ils plans directivs chantunals, examinescha ils plans directivs regiunals sco er las planisaziuns d'utilisaziun da las vischnancas ed è cumpetent per la permissiun d'edifizis e da stabiliments ordaifer la zona da construcziun.

Fotografia agiuntada:

Infurmaziuns:

President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 11.00 fin las 12.00), e‑mail Marcus.Caduff@dvs.gr.ch

Responsabladad: Regenza