Ina maturanda e dus maturands èn vegnids undrads per lur lavurs da maturitad excellentas che han in connex cun la plurilinguitad grischuna. Questa premiaziun è vegnida fatga per l'emprima giada. Ella è ina mesira ord il pachet da realisaziun per promover la plurilinguitad en il chantun Grischun.
La plurilinguitad dal Grischun è in element central da l'identitad dal chantun. Cun premiar per l'emprima giada lavurs da maturitad che tematiseschan en moda scientifica las linguas chantunalas, promova il Departament d'educaziun, cultura e protecziun da l'ambient (DECA) la varietad culturala en il chantun e l'occupaziun cun las identitads culturalas ed istoricas. Ils premis èn vegnids surdads persunalmain dal cusseglier guvernativ Jon Domenic Parolini. La titulara ed ils titulars dals premis han dastgà retschaiver las distincziuns en preschientscha da lur geniturs e da las persunas d'instrucziun en il tschaler da la Chasa grischa.
La titulara ed ils titulars dals premis
La titulara ed ils titulars dals premis da quest onn han tuts frequentà lur onns da gimnasi a la Scola chantunala grischuna a Cuira.
Leonie Caplazi da Cuira ha sviluppà cun sia lavur «Italo 360 – Un viaggio nella lingua italiana» in med d'instrucziun innovativ da talian per la scola bilingua Rheinau a Cuira. Il med d'instrucziun n'ha betg mo ina gronda valur didactica ed è opticamain attractiv, mabain è er ina contribuziun preziusa per promover l'instrucziun bilingua. (Premi: 1000 francs)
Ruben Caflisch da Trin ha persvadì cun la translaziun ed audioproducziun da l'emprim act da «L'avare» da Molière en tudestg da Cuira. Sia lavur mussa en moda impressiunanta l'occupaziun creativa cun furmas linguisticas localas e cun lur transfurmaziun acustica. (Premi: 500 francs)
Manuel Pelican da Lumbrein ha sincronisà la documentaziun taliana dad RSI «La storia infinita» en rumantsch. Ultra da l'exactadad linguistica fa la lavur impressiun pervia da sia integraziun reflectanta da tools da translaziun automatics sco Textshuttle. (Premi: 200 francs)
Il premi è in element da las circa 80 mesiras entaifer ed ordaifer il chantun dal Post spezialisà per la plurilinguitad dal DECA per rinforzar la lingua rumantscha e taliana. «Las lavurs premiadas demussan in grond engaschament, sensibilitad linguistica ed in profund interess per la varietad culturala dal Grischun», sa legra il cusseglier guvernativ Jon Domenic Parolini. Il 2026 vegn la concurrenza ad avair lieu danovamain. Ella sa drizza a tut las scolaras e tut ils scolars dals gimnasis grischuns, che termineschan lur lavur da maturitad la primavaira 2026.
Fotografia agiuntada:
Da sanestra: Cusseglier guvernativ Jon Domenic Parolini, Manuel Pelican, Leonie Caplazi, Ruben Caflisch, Alberto Palaia (delegà dal Post spezialisà per la plurilinguitad)
Infurmaziuns:
Alberto Palaia, delegà dal Post spezialisà per la plurilinguitad, tel. +41 81 257 44 65 (cuntanschibel da las 10.00 fin las 12.00), e‑mail Alberto.Palaia@ekud.gr.ch
Responsabladad: Departament d'educaziun, cultura e protecziun da l'ambient / Post spezialisà per la plurilinguitad