La protecziun d'uffants pertutga nus tuts: Ils 15 da settember 2025 vegn lantschada la Cussegliaziun spezialisada per la protecziun d'uffants en il chantun Grischun. Ella sustegna persunas che lavuran professiunalmain u durant il temp liber cun uffants e giuvenils, che identifitgeschan a temp svilups disfavuraivels e periclitaziuns dal bainstar d'uffants e che ageschan sistematicamain – per ch'il bainstar d'uffants vegnia protegì anc meglier.

La purschida da la Cussegliaziun spezialisada per la protecziun d'uffants è vegnida sviluppada da l'Uffizi chantunal dal servetsch social e planisada da la Regenza sco project da pilot da 4 onns. Tras la cussegliaziun anonima, svelta e gratuita en cas d'eventualas periclitaziuns dal bainstar d'uffants rinforza il chantun Grischun la diagnosa tempriva en la protecziun d'uffants.

Pertge dovri la Cussegliaziun spezialisada per la protecziun d'uffants?
La protecziun d'uffants e da giuvenils è ina da las pli impurtantas incumbensas da nossa societad. Mintga furma da violenza u da negligientscha po avair consequenzas rigurusas per la sanadad corporala e psichica e disturbar il svilup a lunga vista. En il sectur da la protecziun d'uffants èsi perquai indispensabel da proceder en moda sistematica e cumpetenta.

Las situaziuns en la protecziun d'uffants n'èn savens betg cleras. Bleras giadas na datti betg in cler suspect, mabain «mo» in nausch sentiment. En tals cas gida la Cussegliaziun spezialisada per la protecziun d'uffants cun ina valitaziun professiunala, cun orientaziun e cun recumandaziuns d'agir concretas. La finamira è quella da constatar a temp svilups disfavuraivels ed eventualas periclitaziuns d'uffants e d'agir adequatamain.

Tge porscha la Cussegliaziun spezialisada per la protecziun d'uffants?

• Cussegliaziun: En moda nuncumplitgada, anonima e gratuita. La cussegliaziun gida ad ordinar observaziuns, a valitar situaziuns ed en connex cun dumondas davart la moda da proceder.
• «Cumpass» In instrument da lavur per valitar autonomamain situaziuns. El sa basa sin in sistem d'ampla e gida en moda structurada a valitar pass per pass ristgas ed a deducir mesiras adattadas.
• Chaussas interessantas: Infurmaziuns detagliadas davart il tema protecziun d'uffants sin la pagina d'internet www.gr.ch/cumpass.

Tgi po far diever da la purschida?
La purschida stat a disposiziun ad organisaziuns, ad uniuns sco er a persunas singulas ch'èn en contact cun uffants e giuvenils en lur mintgadi professiunal u d'uffizi d'onur.

• Persunas spezialisadas da la furmaziun, assistenza, lavur cun giuvenils, lavur sociala, medischina e.u.v.
• Persunas da referiment en il sectur da temp liber (p.ex. trenadras e trenaders, manadras e manaders da gruppas e da curs)

Tgi sustegna la purschida?
La Cussegliaziun spezialisada per la protecziun d'uffants è ina purschida dal chantun Grischun. Ella è vegnida sviluppada da l'Uffizi chantunal dal servetsch social en collavuraziun cun persunas spezialisadas da differentas gruppas professiunalas, da la Cumissiun spezialisada per la protecziun d'uffants e da l'Agid a la giuventetgna sco er resguardond las basas chantunalas e naziunalas existentas.

La Cussegliaziun spezialisada per la protecziun d'uffants è cuntanschibla da glindesdi fin venderdi mintgamai da las 8.30 fin las 17.00.

Tel.: +41 81 257 65 91
E-mail: cumpass@gr.ch
Internet: www.gr.ch/cumpass

Agiunta:

Flyer «La protecziun d'uffants – ma concerna»

Logo:

Infurmaziuns:

Susanna Gadient, manadra da l'Uffizi dal servetsch social, tel +41 81 257 26 51 (cuntanschibla da las 10.00 fin las 11.30), e‑mail Susanna.Gadient@soa.gr.ch

Responsabladad: Uffizi dal servetsch social