Il chantun Grischun metta in cler signal: La Regenza ha deliberà il sboz per ina nova Lescha cunter violenza a chasa. Cun quai vul ella garantir in proceder coordinà per prevegnir e cumbatter la violenza a chasa e la violenza specifica per la schlattaina.
Violenza en la famiglia ed en il partenadi sco er violenza che sa drizza sistematicamain cunter persunas pervia da lur schlattaina, èn chastiablas e na vegnan betg toleradas en nossa societad. Tuttina èn questas furmas da violenza derasadas en Svizra e pertutgan tut las classas socialas. Violenza vegn per exempel applitgada en furma da violenza corporala, psichica, sexuala ed economica sco er en furma da stalking, mulestas sexualas, maridaglia sfurzada, sterilisaziun sfurzada, mutilaziun genitala feminina e delicts en il num da l'uschenumnada onur.
Spezialmain difficila è la situaziun per persunas pertutgadas da violenza, ch'èn dependentas emoziunalmain, finanzialmain, pervia dal dretg da dimora u en in'autra moda e maniera da la persuna violenta. Per questas persunas èsi ordvart difficil da sa distatgar d'ina relaziun violenta – tant pli impurtants èn mecanissems da protecziun efficazis ed ina stretga collavuraziun dals posts involvids.
Violenza n'ha betg plaz en nossa societad
Ina nova lescha duai rinforzar la collavuraziun interdisciplinara sco er promover in proceder coordinà per prevegnir e per cumbatter la violenza a chasa e la violenza specifica per la schlattaina. Ils puncts centrals da la lescha èn: rinforzar las mesiras da prevenziun e da sensibilisaziun, garantir e meglierar las purschidas da protecziun, d'agid e da sustegn per las persunas pertutgadas da violenza sco er facilitar il barat tranter ils posts involvids e las organisaziuns privatas. Cumpetent per la coordinaziun e la promoziun d'ina collavuraziun interdisciplinara e professiunala en il chantun è il Post da coordinaziun Violenza a chasa.
In ulteriur punct central da la lescha è quel da garantir ina basa da datas unitara, ch'è in agid per analisar ils svilups e per realisar mesiras sistematicas. Betg sco ultim è la lescha er in cler signal, che la violenza n'ha betg plaz en nossa societad e ch'ella vegn impedida e cumbattida sistematicamain.
Ils documents da consultaziun èn ussa disponibels
La consultaziun tar la Lescha cunter violenza a chasa (LVC) dura dals 18 da settember 2025 fin ils 18 da december 2025. Ils documents appartegnents pon vegnir consultads sin la pagina d'internet dal chantun Grischun.
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60, e‑mail Marcus.Caduff@dvs.gr.ch
Responsabladad: Regenza