La Cumissiun dal Cussegl grond per economia e taxas (CET) ha predeliberà la missiva concernent il credit supplementar per promover infrastructuras relevantas per il sistem e sustegna unanimamain la proposta da la Regenza.

Sut la direcziun dal president da la cumissiun Oliver Hohl ed en preschientscha dal president da la Regenza Marcus Caduff, schef dal Departament d'economia publica e fatgs socials, ha la CET predeliberà la missiva da la Regenza concernent il credit supplementar al credit d'impegn general per promover infrastructuras relevantas per il sistem. Il project prevesa d'auzar il credit d'impegn general dad 80 milliuns francs, ch'il Cussegl grond aveva concedì l'onn 2015, per ulteriurs 35 milliuns francs (communicaziun a las medias da la Regenza). Il program per promover infrastructuras relevantas per il sistem dura anc fin l'onn 2030, ma il credit, ch'era vegnì concedì oriundamain, è duvrà si.

Questa missiva sa basa sin l'incumbensa Horrer concernent l'augment dal credit d'impegn general per la finanziaziun d'infrastructuras relevantas per il sistem, che vegn ussa realisada. Uschia pon las experientschas positivas da l'emprima perioda da pajament cuntinuar fin l'onn 2030. La cumissiun predeliberanta è entrada unanimamain en la fatschenta e propona – er unanimamain – al Cussegl grond d'approvar il credit supplementar da 35 milliuns francs. Uschia duai esser pussaivel da conceder er en l'avegnir contribuziuns substanzialas per promover projects che rinforzan il turissem u projects ch'èn impurtants per l'entira economia.

La fatschenta vegn tractada dal Cussegl grond en la sessiun d'october 2025.

Infurmaziuns:

Oliver Hohl, president da la Cumissiun per economia e taxas, tel. +41 79 651 51 78, e‑mail Oliver.Hohl@weberprevost.ch

Responsabladad: Cussegl grond / Cumissiun per economia e taxas