La Regenza ha concludì da metter en vigur la Lescha davart la promoziun e la finanziaziun da mesiras per la protecziun dal clima e l'innovaziun en il Grischun (LGCI) per ils 31 da december 2025. A medem temp ha ella decretà l'ordinaziun respectiva, vul dir l'Ordinaziun davart la promoziun e la finanziaziun da mesiras per la protecziun dal clima e l'innovaziun en il Grischun (OGCI), ed ha approvà la revisiun parziala da l'Ordinaziun d'energia (OEG).

La finamira da la lescha è da decarbonisar il chantun fin l'onn 2050 cun agid da promoziuns sistematicas. Uschia presta la lescha ina contribuziun centrala per la protecziun dal clima e rinforza a medem temp l'economia locala, quai cun sustegnair innovaziuns e cun trair a niz novs potenzials da valurisaziun. La lescha furma la basa per promover innovaziuns en il sectur da l'energia, da l'ambient e da l'economia circulara sco er per sustegnair l'economia e la societad en connex cun l'applicaziun da tecnologias favuraivlas al clima. Quai permetta da rinforzar l'economia regiunala, d'augmentar la resistenza envers las ristgas climaticas, da reducir la dependenza grischuna da purtaders d'energia fossila sco er da stgaffir cundiziuns generalas liantas per in futur che schanegia las resursas.

Ulteriuras infurmaziuns: www.klimawandel.gr.ch

Infurmaziuns: Departament d'educaziun, cultura e protecziun da l'ambient

La Regenza ha approvà la revisiun parziala da l'Ordinaziun davart il manaschi da pestga (Prescripziuns da pestga). La revisiun parziala duai entrar en vigur il 1. da schaner 2026. La Cumissiun da pestga e la suprastanza da la Federaziun chantunala dals pestgaders grischuns èn vegnidas infurmadas davart las midadas e beneventan quellas.

Las Prescripziuns da pestga èn il pli impurtant instrument per reglar la pestga grischuna da patenta. Las cundiziuns generalas ch'èn fixadas en quest relasch duain dar a las pestgadras ed als pestgaders uschè bleras libertads sco pussaivel, ma er garantir ina pestga persistenta. Ivala da chattar ina ballantscha equilibrada tranter las restricziuns necessarias che resguardan la biologia dals peschs e permettan ina pestga orientada a l'utilisaziun. Perquai che las cundiziuns generalas ed ils basegns da la basa da pestga, ma er las enconuschientschas davart la biologia dals peschs e davart la protecziun dals animals sa midan cuntinuadamain, vegn la commensurabladad da las Prescripziuns da pestga controllada regularmain, ed en cas da basegn vegnan las prescripziuns adattadas.

Tras la revisiun parziala actuala vegnan armonisadas las disposiziuns da pigliar peschs en il Lai da Livigno, che sa chatta al cunfin cun l'Italia. Plinavant vegnan las litschalas protegidas meglier, il scumond da duvrar estgas natiralas vegn extendì, ed ils temps da pestga sco er ils territoris da schanetg vegnan adattads. Ultra da quai cuntegna il project in'emprova da pilot en la Moesa: Differentas disposiziuns da pestga daventan là cleramain pli severas, ed i vegn surveglià, tge effect che quai ha per la populaziun da peschs. .

Infurmaziuns: Departament d'infrastructura, energia e mobilitad