Las elecziuns dal Cussegl naziunal han lieu mintga 4 onns la segund ultima dumengia d'october. Il termin per las elecziuns da renovaziun dal Cussegl naziunal per la durada d'uffizi da 4 onns che cumenza cun la sessiun d'enviern 2023 è dumengia, ils 22 d'october 2023. Ils tschintg sezs dal chantun Grischun en il Cussegl naziunal vegnan surdads tenor la procedura electorala da proporz. Il dretg d'eleger han quellas persunas che han il dretg da votar. Elegiblas resp. elegibels èn las candidatas ed ils candidats che figureschan sin las glistas. Per las elecziuns dal Cussegl naziunal en il chantun Grischun valan ils suandants termins:

• cumenzament dal temp per inoltrar propostas electoralas: 22 da matg 2023
• fin dal temp per inoltrar propostas electoralas: 7 d'avust 2023
  (ston arrivar tar la Chanzlia chantunala fin il pli tard las 12.00)
• fin dal temp per inoltrar la decleraziun da colliaziuns e da sutcolliaziuns da glistas: 14 d'avust 2023
• fin dal temp per rectifitgar las propostas electoralas: 14 d'avust 2023
• publicaziun da las propostas electoralas: 15 d'avust 2023
• publicaziun da las propostas electoralas en il Fegl uffizial: 17 d'avust 2023
• elecziuns dal Cussegl naziunal: 22 d'october 2023

Quests termins ed ulteriuras infurmaziuns èn vegnids publitgads en il Fegl uffizial chantunal dal 1. da favrer 2023.

Regulaziun per numerar las glistas
Las glistas vegnan numeradas tenor la successiun da las propostas electoralas inoltradas. Sche pliras glistas electoralas vegnan inoltradas il medem di, decida la sort davart la numeraziun.