Cun sia purschida «in ad in» presta la Crusch cotschna svizra (CCS) dal Grischun dapi 15 onns ina contribuziun indispensabla per la lavur d'integraziun. Collavuraturas e collavuraturs voluntaris da la Crusch cotschna sustegnan fugitivas e fugitivs d'emprender la lingua, da s'integrar socialmain ed en il mintgadi u d'emprender per la furmaziun professiunala – ina purschida che sa basa sin barat e chapientscha.
La purschida dad «in ad in» da la CCS dal Grischun intermediescha voluntarias e voluntaris per engaschaments a temp limità e cun cleras finamiras tar fugitivas e fugitivs che han il dretg da restar en Svizra. La finamira è quella da promover l'integraziun en furma d'in process da barat. Tras lur sustegn ed accumpagnament en il mintgadi prestan las voluntarias ed ils voluntaris ina contribuziun preziusa, per che las fugitivas ed ils fugitivs possian s'orientar meglier en l'ambient ester ed uschia manar uschè svelt sco pussaivel ina vita independenta. Ellas ed els gidan a las fugitivas ed als fugitivs d'emprender nossa lingua, da chapir las relaziuns socialas e las cundiziuns da viver sco er da dumagnar andaments dal mintgadi en il nov conturn.

Da l'idea al success integrativ
L'idea per «in ad in» è naschida d'in pitschen project da pilot: Ina lavurera sociala dal Servetsch social regiunal da Cuira ha mess il crap da fundament. Tras l'incumbensa da l'Uffizi chantunal dal servetsch social a la CCS dal Grischun è il project vegnì lantschà uffizialmain l'onn 2009. La CCS dal Grischun ha surpiglià l'incumbensa da chattar voluntarias e voluntaris per il project, quai cun sustegn dal Post spezialisà per l'integraziun dal Grischun. L'onn suandant ha «in ad in» cumenzà cun 19 voluntarias e voluntaris e cun 33 incumbensas – il cumenzament d'ina istorgia da success. Fin l'onn 2024 è il dumber da las persunas voluntaras s'augmentà a 130 e las incaricas annualas a 200. Las uras prestadas èn creschidas dad 808 a 5163. Questas cifras na mussan betg mo la dumonda creschenta, mabain er l'efficacitad da la purschida.

Dorothee Pujol, manadra da la partiziun Migraziun tar la CCS dal Grischun, di davart il svilup: «Quai che ha cumenzà ina giada sco pitschen project da pilot, è daventà ina part essenziala da la lavur d'integraziun en il Grischun. Numerusas voluntarias e numerus voluntaris èn s'engaschads durant quests onns, han accumpagnà bleras fugitivas e blers fugitivs sin lur via d'integraziun en Svizra ed han survegnì invistas instructivas da la vita da lur visavi. Il project «in ad in» mussa en moda impressiunanta, che l'integraziun è in process vicendaivel, dal qual tuttas duas varts pon profitar.»

Occurrenza da giubileum «in ad in»
Mesemna, ils 21 da matg 2025 ha gì lieu a Cuira in'occurrenza per il giubileum da 15 onns cun in'undrientscha da l'istorgia, dal success e da l'engaschament voluntar per questa purschida d'integraziun. Envidads eran tut las voluntarias ed ils voluntaris dad «in ad in» cun lur partenarias e partenaris da tandem sco er ils partenaris da rait dals posts chantunals spezialisads. L'occurrenza ha purschì contribuziuns inspirantas: Pleds da bainvegni da Hans Geisseler, president da la CCS dal Grischun e dal cusseglier guvernativ Peter Peyer, schef dal Departament da giustia, segirezza e sanadad. Prof. dr. Sylvie Johner-Kobi, docenta e manadra da project a la Scola auta turitgaisa per scienzas applitgadas, ha preschentà ses studi ch'è vegnì publitgà l'onn 2024 ‹Tandemprogramm mit Geflüchteten: Vom Deutsch lernen bis zum gemeinsamen Kochen› www.zhaw.ch tschertgar ‹Begleitevaluation Tandemprogramm›) ed ha inditgà ils facturs e las enconuschientschas principalas per che tals tandems reusseschian. In referat da Felix Birchler, incumbensà chantunal d'integraziun e manader dal Post spezialisà per l'integraziun dal Grischun, ha accentuà l'impurtanza dad «in ad in» entaifer las mesiras chantunalas d'integraziun ed ha exprimì sia stima da la lavur che la CCS dal Grischun ha prestà.

In discurs al podium infurmativ e commovent tranter ina incumbensada da l'Uffizi dal servetsch social dal Grischun, ina coordinatura da la CCS dal Grischun, ina voluntaria dad «in ad in» ed in anteriur partenari da tandem, ha dilucidà las differentas vistas dals tandems «in ad in» ed ha dà ina invista pli profunda da las differentas fassettas d'accumpagnaments prosperaivels.

Vulais er Vus As engaschar voluntarmain per fugitivas e fugitivs? As annunziai per plaschair https://www.srk-gr.ch/de/freiwilliges-engagement/entlasten-begleiten-besuchen-freizeitprojekte-gestalten/freiwillige-fuer-0