Da la pratica
Citad, champagna, lavur
L'integraziun professiunala da fugitivas e fugitivs è darar ina via directa. La jobcoach Ines Hausser accumpogna umans sin questa via ed enconuscha las sfidas localas specificas.
Betg darar cumenza Ines Hausser in emprim discurs cun in puzzle. «Jau emprov d'unir la situaziun famigliara, ils temas da sanadad e la situaziun professiunala.» Sco jobcoach accumpogna ella fugitivas e fugitivs renconuschids e persunas admessas provisoricamain da tschiffar pe en il martgà da lavur svizzer. Mintga cas è auter – ma savens marcà da malsegirezzas, da dumondas avertas e per part da faussas aspectativas. «Igl è pretensius, sch'insatgi è bain motivà, ma sch'i mancan las cumpetenzas fundamentalas. Alura stoss jau declerar, pertge ch'in pass direct en la vita professiunala n'è anc betg realistic e pertge ch'igl è en in emprim pass necessari d'acquistar qualificaziuns», di ella. I dettia però er persunas che hajan fatg in examen d'advocat en lur patria e che stoppian cumenzar praticamain tar nulla. «Quai n'è betg mo difficil per motivs professiunals, mabain savens er ina situaziun umana pretensiusa.»
Impurtant per il success d'ina integraziun professiunala saja, da mussar la via en moda transparenta. «Sch'insatgi n'ha nagin plan e nagina perspectiva, è quai difficil da supportar. Finamiras fan curaschi.» Perquai accumpogna Hausser sias clientas e ses clients en discurs da preschentaziun u cun scriver lur curs da la vita. Uschia sa sentian els puspè abels d'agir e quai saja fitg impurtant, declera Hausser
Flexibilitad remartgabla
Er il lieu da domicil è ina part dal puzzle. El n'è betg sulet decisiv per u cunter il success, ma el influenzescha la vita da mintgadi. Uschia integrescha Hausser er quest aspect. I capitia, ch'ella chattia ina plazza d'emprendissadi u ina plazza da lavur adattada per ina clienta u in client, che quella saja dentant lunsch davent dal lieu da domicil. «Far midada n'è betg simpel», di Hausser. Quai per motivs famigliars u perquai ch'il spazi d'abitar pajabel è stgars. Ed er perquai che las fugitivas ed ils fugitivs hajan insumma difficultads da chattar in'abitaziun. «En tals cas èsi impressiunant, co ch'ellas ed els prendian en cumpra senza reclamar lungs viadis a la lavur». I dovria savens flexibilitad, perquai che bleras purschidas da scolaziun e da furmaziun supplementara èn a ed enturn Cuira ed han lieu la saira. «Tgi che n'abita betg qua, dovra bler temp u na po insumma betg sa participar», uschia Hausser. «En tals cas stuain nus adattar il puzzle», raquinta ella cun in surrir. Per emprendistas ed emprendists disponian ins però per fortuna da plazs d'abitar en la chasa d'emprendists a Cuira.
Vischinanza e pussaivladads
Entant ch'in domicil a ed enturn Cuira gida pertutgant ils aspects menziunads, ha la vita en ina vischnanca autras qualitads. Là gidia ina stretga rait da relaziuns, raquinta Hausser. «Grazia a la recumandaziun da ses vischin ha dacurt in client, che vuleva lavurar a Tavau en l'analisa da datas da l'intelligenza artifiziala, pudì discurrer pli baud cun il patrun giavischà.» Tals muments mussian cleramain, quant impurtantas che relaziuns sajan per l'integraziun – en la citad sco er sin la champagna. En las regiuns perifericas haja ella sezza main contacts persunals cun pussaivels patruns e manaschis d'emprendissadi, di Hausser. «Nus jobcoaches discutain dentant ensemen e profitain dal fatg, che nus avain sezs differents lieus da domicil, differentas ragischs e differentas raits.»
Ines Hausser - Jobcoach Post spezialisà per l'integraziun
Jau sun creschida si en ina pitschna val laterala dal Vorarlberg – ina val rurala, isolada, cun in territori da skis. Per ir a lavurar duvravi da quel temp in auto e bler temp. Oz viv jau en l'aglomeraziun da Cuira e giaud la buna cuntanschibladad cun il traffic public. L'experientscha d'in vitg collià stretgamain ma caracterisescha dentant fin oz: Ins s'enconuscha, sa gida e discurra in cun l'auter.
Mia via professiunala ha cumenzà cun ina scolaziun da laboranta da chemia. Suenter ina fasa da famiglia sun jau turnada en ina funcziun directiva dal facility management. Durant quest temp è creschì mes interess per la lavur cun umans. Perquai hai jau fatg ina furmaziun supplementara sco coach diplomada. Pli tard hai jau anc absolvì in studi da management da business ed hai la finala midà en il sectur da las resursas umanas. Il maletg da l'uman plitost distanzià e numeric da questa branscha na correspundeva dentant betg a mia idea dal contact cun umans.
Ils gronds moviments da fugia 2015/16 m'han avert novas perspectivas: Jau hai pudì surpigliar la direcziun d'in center d'asil – in'activitad pretensiusa che m'enritgescha. Il contact direct cun umans, als accumpagnar e sustegnair en ina situaziun da vita difficila – quai è stà il mument che m'ha mussà che quai è mia via. Jau sun ma scolada vinavant en cumpetenzas interculturalas ed hai manà in ulteriur center. Las rollas directivas n'èn mai stadas uschè impurtantas per mai sco la responsabladad per singuls umans e lur istorgias.
Dapi bundant 2 onns lavur jau ussa en il Post spezialisà per l'integraziun sco jobcoach cun il focus sin persunas admessas provisoricamain e sin fugitivs renconuschids fitg qualifitgads. Jau accumpogn questa clientella cun respect per quai che mintga singula persuna porta cun sai. Lur pazienza, perseveranza e motivaziun da persequitar lur finamiras m'impressiunescha adina puspè. Questa energia positiva stimulescha er mai – jau vom mintga di gugent a lavurar.
«Las rollas directivas n'èn mai stadas uschè impurtantas per mai sco la responsabladad per singuls umans e lur istorgias.»
Text: Philipp Grünenfelder; Illustraziun:Lorena Paterlini