Navigation

Inhaltsbereich

Cun interpretaziun interculturala è manegiada la translaziun a bucca dal pled discurrì d'ina lingua en l'autra, resguardond las circumstanzas socioculturalas da las participantas e dals participants dal discurs. Igl ha lieu ina situaziun da trialog – in "dialog a trais" –, principalmain en ils fatgs da furmaziun, da sanadad e socials. Per quest intent po l'interpreta culturala u l'interpret cultural esser preschent al lieu u esser collià per telefon.

Servetsch d'intermediaziun Arge Verdi – interpretaziun interculturala en la Svizra orientala

Per incumbensa dals chantuns Son Gagl, Turgovia, Grischun, Appenzell Dador e Glaruna intermediescha Arge Verdi interpretas interculturalas ed interprets interculturals per passa 70 linguas. La purschida sa drizza ad autoritads ed ad organisaziuns dals fatgs da sanadad, a scolas ed ad instituziuns da furmaziun sco er a posts spezialisads ed a posts da cussegliaziun sociala.

Arge Verdi – interpretaziun interculturala en la Svizra orientala
Rorschacherstrasse 1
9004 Son Gagl

Tel. 0848 28 33 90
E-Mail: verdi@arge.ch
www.arge.ch/verdi

Servetsch d'interpretaziun per telefon

Il servetsch d'interpretaziun per telefon metta a disposiziun entaifer paucas minutas interpretas ed interprets professiunals per passa 50 linguas.

Tel. 0842 442 442
www.0842-442-442.ch

Plattafurma d'emprender per l'interpretaziun interculturala

A las persunas spezialisadas ch'èn participadas a situaziuns da trialog sco er a las interpretas interculturalas ed als interprets interculturals porscha la plattafurma d'emprender ina gronda schelta d'infurmaziuns, da films, da materialias e da documents didactics per s'acquistar u per augmentar sistematicamain las cumpetenzas ch'èn necessarias per ina collavuraziun da success.

Ulteriuras infurmaziuns: trialog.inter-pret.ch

 

Trialog – interpretaziun interculturala en praticas da medis

Dapi il 1. da mars 2018 vegn il project «Trialog – interpretaziun interculturala en praticas da medis» cofinanzià da l'Uffizi da sanadad e dal Post spezialisà per l'integraziun, quai cun in sistem da bons e cun in import maximal fix.

Las praticas da medis da chasa e da medis spezialists en il chantun Grischun èn vegnidas infurmadas davart la purschida ed ils bons vegnan distribuids mintga onn a las praticas interessadas.

Per infurmaziuns davart la purschida As stat a disposiziun il Post spezialisà per l'integraziun sut il numer da telefon 081 257 26 38.

Infurmaziuns generalas davart l'interpretaziun interculturala en praticas da medis chattais Vus en la broschura «Trialog – interpretaziun interculturala en praticas da medis» da l'Uffizi da sanadad dal Grischun.

La broschura (tudestg)