Navigation

Inhaltsbereich

Tras la nova legislaziun federala èn ils chantuns e las vischnancas responsabels per manar, per coordinar e per realisar la promoziun da l'integraziun.

L'integraziun da persunas estras duai vegnir realisada en emprima lingia sur las structuras regularas, sco en spezial la scola, la furmaziun professiunala, il mund da lavur, ma er sur las instituziuns da la segirezza sociala e dals fatgs da sanadad.

Cumplementarmain a las stentas da las structuras regularas dovri purschidas en ils secturs da l'infurmaziun e da la cussegliaziun, da la lingua e da la furmaziun sco er da la chapientscha e da l'integraziun sociala per serrar largias correspundentas en las purschidas regularas resp. per sustegnair persunas che n'han nagin access a tut quai en lur process d'integraziun e per las pussibilitar l'access a las structuras regularas.

Criteris per in sustegn

Criteris obligatorics

  1. Il project ha cleras finamiras e sa drizza a persunas estras che han prendì ina dimora legala e durabla en il chantun.
  2. Il project definescha la gruppa che vegn prendida en mira cun las mesiras da promoziun e declera, co che questa gruppa possia vegnir cuntanschida.
  3. Ils custs dal project stattan en ina relaziun adequata cun il niz intenziunà.
  4. Il project è persistent e tegna quint dal process d'integraziun individual a lunga vista.
  5. In sustegn finanzial vegn dà a cundiziun d’ina finanziaziun adequata da terzas persunas

Criteris previs

  1. Il project meglierescha e promova l'access da las persunas immigradas ad instituziuns statalas e privatas.
  2. Il project s'orientescha vi dals basegns da la vita quotidiana da las persunas estras. Il mintgadi cumpiglia er l'integraziun sociala e culturala.
  3. Il project rinforza las atgnas cumpetenzas e las resursas individualas. El qualifitgescha la gruppa en mira da mobilisar sias atgnas forzas per l'integraziun e da decider en atgna responsabladad.
  4. Il project tegna quint dal fatg che l'integraziun è in process vicendaivel ed integrescha – uschenavant sco pussaivel – l'entira populaziun.
  5. Il project promova l'acquist da cumpetenzas cardinalas per avanzar en scola, en la furmaziun ed en la lavur ubain per entrar u per returnar en la vita professiunala.