La restampa è permessa pir suenter ils 15 da settember 1999
La regenza a la populaziun dal chantun Grischun
Charas convischinas, chars convischins
Avant 500 onns han eveniments da guerra influenzà il pajais e la
populaziun dal Grischun. Sco eveniment sanguinus è oravant tut la
battaglia da Chalavaina ida en l'istorgia. Quest onn han gì lieu pliras
occurrenzas en il Grischun ed en pajais cunfinants ch'èn s'occupads dals
eveniments da lez temp. Igl è caracteristic per talas occurrenzas
ch'ellas n'èn betg deditgadas tant als aspects dal passà, mabain plitost
a la dumonda, tge senn ch'in tal "giubileum da battaglia" possia anc
avair en noss temp.
Il senn da la commemoraziun d'eveniments da guerra po esser
multifar. Il sguard enavos po svegliar sentiments d'engraziaivladad che
noss pajais, noss chantun e noss vischins directs en l'exteriur dastgan
viver oz en pasch. El dat dentant er la pussaivladad d'intensivar las
relaziuns cun ils vischins ch'èn caracterisadas oz da bun'armonia e
respect vicendaivel, cun l'intenziun da chapir anc dapli in da l'auter e
da trair a niz questas experientschas per schliar ils problems sur ils
cunfins ora. Pussaivla è alura er la reacziun stinada che tals u
sumegliants eveniments na dastgan betg pli sa repeter - ni uss ni en il
futur.
Charas convischinas e chars convischins, Vus vegnis forsa a dir
ch'ils arguments pussaivels menziunads per in sguard enavos sin
eveniments da guerra sa chapeschian oz da sasez. Nus giudain oz ina vita
en pasch e bainstanza che metta cumplettamain a chantun la tema da
guerras e destrucziuns. La situaziun actuala en Europa e sin il mund ans
mussa deplorablamain che quai n'è betg il cas. Bain n'essan nus betg las
unfrendas d'ina smanatscha directa. Ma nus tuts essan quest onn
perditgas d'ina tragedia umana che ha lieu en pauca distanza da noss
pajais en Serbia, en il Kosovo e per part en ils territoris cunfinants.
Esser perditga da suffrientschas umanas vul er dir: esser participà directamain. Il
cumond dal respect cristian per il proxim pretenda che nus fetschian tut noss
pussaivel per gidar las persunas ch'èn en privel da mort, ils
persequitads, ils torturads, ils blessads e quels ch'èn periclitads en
lur existenza fisica e psichica.
I dovra agid en dus reguards: l'emprim dovri agid umanitar che prova
da mitigiar la misergia acuta, che pussibilitescha da viver e da
surviver, che maina ensemen quels ch'èn vegnids separads e che mussa
perspectivas per in return en la patria. Ma i dovra er la manifestaziun
clera ch'eveniments identics u sumegliants na dastgan betg sa repeter ni
en Serbia ed en il Kosovo, ni en la regiun muntagnarda curda, ni
uschiglio en l'Europa u en in auter continent.
I fiss prepotent da crair che nus sulets sco pajais e pievel
pitschen hajan la forza e l'influenza da chaschunar ina tala midada al
meglier. Il sentiment da flaivlezza ch'è mintgatant absolutamain
giustifitgà en vista a conflicts che vegnan reglads cun armas na dastga
dentant betg ans surmanar d'acceptar la guerra, la destrucziun e la
misergia umana sco part integrala da noss mintgadi. Be sche nus, ans
regurdond da nossa cardientscha, da nossas valurs fundamentalas
cristianas e da nossa tradiziun umanitara, faschain tut noss pussaivel
per evitar conflicts, es noss agir consequent e sincer. Questa
constataziun vala egualmain per regenzas, instituziuns internaziunalas,
persunas e gruppas cun auta stima en la publicitad e per las simplas
burgaisas ed ils simpels burgais. Mintgina e mintgin ha en sia funcziun
la pussaivladad da viver toleranza e respect per il proxim, da mussar
chapientscha per autras culturas ed auters usits, da pratitgar prontezza
da gidar en la vita da mintgadi. Forsa è quai la semenza che vegn in di
a crescher en ina cuminanza da pievels che n'è forsa betg dal tut libra
da conflicts, ma che ha pli paucs conflicts e conuscha pli pauca
violenza.
Charas convischinas e chars convischins, en vista als conflicts
internaziunals na vulain nus betg emblidar ils conumans en noss agen
pajais che han per in motiv u l'auter da purtar ina greva chargia. Lain
empruvar da gidar er quels, pratitgond quai che nus sperain per l'entir
mund: ina cuminanza che vegn sustegnida dal respect vicendaivel e da
l'assistenza sincera.
A Vus tuts giavischain nus fortuna e la bendedicziun dal Segner.
Possia il Tutpussant proteger noss conumans e nus.
Cuira, il settember 1999
En num da la regenza
Il president:
Klaus Huber
Il chancelier:
dr. Claudio Riesen
Gremi: Regenza dal Grischun
Funtauna: rg Regenza