En exchavaziuns sin il cumplex fortifitgà Munt Son Gion (vischnanca
da Seglias) ha il servetsch archeologic dal Grischun (SAG) pudì manar a
glisch in battisteri dal temp medieval tempriv. La construcziun ch'era
dal tuttafatg nunenconuschenta fin uss e che giascheva sut grondas
quantitads da mischiera era vegnida construida il tschintgavel fin il
sisavel tschientaner suenter Cristus ed è pia in dals pli vegls edifizis
sacrals en il chantun Grischun.
Bain mantegnids e visibels uss èn ils mirs da fin dus meters autezza
cun restanzas da liadira ed ina apsida mez radunda a l'ost sco er il
battisteri central octagonal culà en il funs da maulta (piscina).
Battisteris cumparegliabels dal temp medieval tempriv eran enconuschents
en la proxima vischinanza fin uss be en la claustra da Mustér ed a
Schaan FL. Els dateschan d'in temp, en il qual vegnivan battegiadas per
gronda part persunas creschidas. En la ceremonia gievan quellas en l'aua
dal crap da batten fin tar la schanuglia ed il sacerdot laschava cular
aua sur ellas. Pir a partir dal otgavel tschientaner è vegnì introducì
il ritual usità oz ed applitgà en emprima lingia per uffants, uschia
ch'ins duvrava ils craps da batten en furma d'ina maisa radunda che nus
enconuschain oz.
Il battisteri da Munt Son Gion è vegnì agiuntà ad ina construcziun
pli veglia che n'è anc betg vegnida messa a glisch. Cun gronda
probabilitad represchenta quella la baselgia la pli veglia sin il
cumplex fortifitgà ed è vegnida substituida pir enturn l'onn 1400 da la
baselgia da s. Gion Battista ch'exista anc oz. Blers fragments da la
liadira, per part malegiads cun colurs e d'ina qualitad
extraordinariamain buna, dateschan probablamain da la decoraziun da
quest edifizi. Las persunas che fan las exchavaziuns speran che las
retschertgas en curs dettian er explicaziuns davart la dataziun dal mir
da fortificaziun che passa directamain a l'ost dal battisteri. Ina fossa
scuvrida directamain ordaifer il battisteri rinviescha ad eventualas
ulteriuras sepulturas.
Ils resultats da las exchavaziuns mettan uss en ina nova glisch er
l'istorgia pli veglia dal cumplex fortifitgà Munt Son Gion, davart la
quala ins na pudeva fin oz anc betg far bleras explicaziuns concretas.
Uss èsi da considerar il cumplex fortifitgà sco in dals pli vegls da la
Svizra; cun diever nuninterrut da milli onns, numnadamain dal
5avel/6avel fin il 15avel tschientaner.
Gremi: servetsch archeologic dal Grischun
Funtauna: rg servetsch archeologic dal Grischun