La nova "ordinaziun davart il post da revisiun da fundaziuns"
fixescha, tge fundaziuns che na ston avair nagina revisiun u tge
fundaziuns che ston avair ina persuna spezialmain qualifitgada sco
revisura resp. sco revisur. La regenza grischuna sustegna da princip il
sboz per quella ordinaziun.
La confederaziun propona ch'ils chantuns sco autoritads da
surveglianza da las fundaziuns possian, na stoppian dentant betg,
liberar ina fundaziun da l'obligaziun da designar in post da revisiun.
Decisiva per quai è l'autezza da la facultad netta - quella na dastga
betg esser pli gronda che 20'000.- francs en dus onns in suenter l'auter
- e la fundaziun na dastga betg appellar publicamain da far donaziuns.
Tar fundaziuns perencunter che appelleschan publicamain da far donaziuns
e che survegnan uschia en dus onns in suenter l'auter dapli che
100'000.- francs, sto vegnir engaschada ina persuna spezialmain
qualifitgada sco revisura respectivamain sco revisur.
En il dretg grischun n'èn fixadas naginas normas per fundaziuns
d'avair in post da revisiun obligatori e da manar obligatoriamain ina
contabilitad. Eventualas adattaziuns dal dretg grischun possian però
vegnir fatgas fin il cumenzament dal fanadur 2005, scriva la regenza
grischuna en sia posiziun al departament federal da giustia e polizia.
Contribuziuns chantunalas a differentas instituziuns
- Viafier retica: Ils indrizs da cumond a distanza antiquads per las
staziuns da cruschada sin la lingia d'Arosa, sin la lingia dal Bernina
tranter Puntraschigna e Spinas sco er tranter San Murezzan e Scuol duain
vegnir renovads cumplettamain. Per quai ha la regenza concedì
contribuziuns chantunalas da totalmain circa 2,8 milliuns francs. La
confederaziun sa participescha vi da quests projects cun totalmain circa
12,7 milliuns francs.
- Fundaziun Planta, Samedan: Per digitalisar ils effectivs da la
biblioteca survegn la fundaziun fin l'onn 2007 ina contribuziun
chantunala unica da 35'000 francs.
- Museum regiunal Surselva MRS: Per il project "nov posiziunament
dal MRS" ha la regenza approvà ina contribuziun chantunala da totalmain
20'000 francs fin l'onn 2006. Cun quai vul il museum fixar sia direcziun
strategica per il futur ed elavurar in concept da manaschi.
- Meds da la lottaria naziunala interchantunala: L'uniun
federalistica da las communitads etnicas europeicas (UFCE) e la societad
culturala da la Bregaglia survegnan contribuziuns chantunalas da
totalmain maximalmain 35'000 francs per il seminar da la UFCE "Pievels
senza kin-state e lur autonomia" a Mustér respectivamain per il project
"Il giardino del suono" a Stampa.
Projects da vias
La regenza ha approvà totalmain circa diesch milliuns francs per la
construcziun e la sanaziun da divers trajects da via:
- via sursilvana da la vart dretga dal Rain dal vallun da Carrera
fin a Valendau: punts a la spunda "Bergwegli", "Sandkehr West" e "Chera
2".
- Sevgein-Riein: traject da Bargun a Flutginas
- via sursilvana: traject da Sumvitg a Spligias;
- via dal Schin: sanaziun dal tunnel dal vallun da Mut;
- sviament da Filisur: construcziun da la punt da l'ual da Falein;
- via dal Partenz: sviament da Claustra, access Claustra
Selfranga/Vereina e correcziun "Gruobenstutz".
Chaussas persunalas
- Martin Frei (1972), actualmain ad Amriswil, è vegnì elegì per il
1. da fanadur en l'uffizi forestal dal Grischun sco inschigner forestal
directiv per las ovras da protecziun.
- Ruedi Gall (1964), actualmain a Berschis, è vegnì elegì per il 1.
da november en l'uffizi da construcziun bassa sco manader dal ressort
"mantegniment da construcziuns artifizialas".
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun