La regenza grischuna ha avert la consultaziun tar la revisiun
parziala da la lescha da taglia. Cun quest sboz duai en emprima lingua
vegnir rendì pli attractiv il Grischun sco lieu fiscal. Ultra da quai
duain vegnir realisadas distgargias fiscalas per conjugals e per
famiglias. La taglia sin il gudogn da las persunas giuridicas la pli
auta da tut la Svizra duai vegnir reducida massivamain. La correctura è
necessaria per pudair mantegnair plazzas da lavur en Grischun e per
pudair facilitar investiziuns novas. Grazia a quest sbassament vegn il
chantun ad avair ina chargia media cumpareglià cun ils auters chantuns.
En il dretg vertent vegnan conjugals e famiglias cun uffants
distgargiads memia pauc en cumparegliaziun cun persunas che vivan
sulettas. Quai duai vegnir curregì cun introducir in splitting parzial
cun in divisur dad 1.9 e cun augmentar las deducziuns ch'èn relevantas
per uffants. Las deducziuns per uffants vegnan fixadas sin 5'000 francs
per uffants da la vegliadetgna prescolara e sin 8'000 francs per ils
ulteriurs uffants. Plinavant vegn la deducziun per ils custs effectivs
per la tgira d'uffants fixada sin 6'000 francs. Cun deliberar las
descendentas directas ed ils descendents directs da la taglia sin
l'ierta po vegnir eliminà in dischavantatg dal Grischun cumpareglià cun
ils auters chantuns. Questa deliberaziun facilitescha dentant er da
surdar las interpresas pitschnas u mesaunas (IPM) als uffants ed è fitg
impurtanta per la successiun en l'interpresa. L'aboliziun da la taxa
speziala sin il chapital e sin la facultad s'impona, perquai che la
taglia sin il chapital da las persunas giuridicas e la taglia sin la
facultad da las persunas natiralas èn gia fitg autas cumpareglià cun
auters chantuns.
Las differentas mesiras vegnan a chaschunar entradas massivamain pli
pitschnas per il chantun, per las vischnancas ed er per las baselgias.
Quellas importan per il chantun circa 80 milliuns francs e per las
vischnancas (incl. ils cumins-baselgia) circa 50 milliuns francs. Il
cussegl grond aveva tractà ils avantatgs da quest sboz en la sessiun
d'october ed inditgà la direcziun per la revisiun parziala. El era da
l'avis ch'il Grischun stoppia far quest pass, sch'el veglia -
cumpareglià cun ils auters chantuns - puspè daventar cumpetitiv sco
plazza economica ed er sco domicil per bunas pajataglias, per buns
pajataglias e per famiglias. La consultaziun dura fin ils 15 da mars
2006. Ils documents da consultaziun pon vegnir chargiads sin il computer
sut www.stv.gr.ch.
Fixà il termin d'elecziun per la regenza e per il cussegl grond sin
ils 21 da matg 2006
Il termin per las elecziuns da renovaziun da la regenza è vegnì fixà
sin dumengia, ils 21 da matg 2006. In eventual segund scrutini è previs
per dumengia, ils 11 da zercladur 2006. Las elecziuns cirquitalas
(elecziuns dal cussegl grond ed elecziuns da la presidenta cirquitala
respectivamain dal president cirquital sco er da sia suppleanta
respectivamain da ses suppleant) han er lieu la dumengia, ils 21 da matg
2006. In eventual segund scrutini è previs er qua per dumengia, ils 11
da zercladur 2006. Ultra da quai prenda la regenza enconuschientscha dal
fatg ch'il conclus federal dals 16 da december 2005 davart la
reordinaziun da la disposiziun constituziunala davart la furmaziun vegn
suttamess a la votaziun dal pievel sco project federal. I na dat naginas
votaziuns davart projects chantunals.
Da vischnancas e regiuns
- Ftan: En il vitg da Ftan vegn fixada la sveltezza maximala a 30
km/h ed i vegn introducida ina "zona da tempo 30" per tut il vitg, e
quai integrond la via chantunala da Ftan Pitschen, a partir dal
territori da "Fuschina" avant il spartavias per Ftan Pitschen/Ftan
Grond, e da Ftan Grond, a partir da la chasa Garatti. Quai ha la regenza
grischuna concludì sin dumonda da la vischnanca.
- Panaduz: Il plan da zonas 1:1'000 "Cotglera Pintga" ed il plan
general d'avertura 1:1'000 "Cotglera Pintga" da la vischnanca da
Panaduz, domadus dals 28 da november 2005, vegnan approvads.
- Glion/Flond: Il plan general d'avertura 1:2'500 "provediment e
dismessa" da la vischnanca da Glion, concludì ils 28 da schaner 2005,
vegn approvà areguard las fixaziuns sistidas en connex cun l'ennavada da
la via da scarsolar Flond - Glion. Er approvada vegn la cumplettaziun da
la lescha da construcziun da la vischnanca da Flond ch'è vegnida
deliberada ils 13 da zercladur 2005. Il plan general d'avertura 1:5'000
"indrizs d'ennavar per la via da scarsolar" dals 18 da november 2005
vegn er approvà.
- Sumvitg: Il plan da zonas e plan general da furmaziun 1:1'000
"Laits" da la vischnanca da Sumvitg dals 12 da december 2005 vegn
approvà.
- Zuoz: La regenza approvescha la revisiun parziala da la
constituziun communala da la vischnanca da Zuoz, concludida da la
radunanza communala ils 10 da december 2003.
- Tavau: La lescha davart l'imposiziun da las taxas per la promoziun
da la cura, dal sport e dal turissem (lescha da taxas dals giasts) da la
vischnanca da Tavau dals 18 da december 2005 vegn approvada.
- S-chanf: L'urden per taxas da cura e per taxas da propaganda da la
vischnanca da S-chanf dals 30 da november 2005 vegn approvada.
- Ramosch: La revisiun totala da la lescha da taxas da cura e da
promoziun dal turissem da la vischnanca da Ramosch dals 22 da november e
dals 21 da december 2005 vegn approvada.
Contribuziuns chantunalas a differentas instituziuns
- "Archiv grischun da maletgs": Al project "archiv grischun da
maletgs" da la fundaziun capauliana conceda la regenza ina contribuziun
unica da maximalmain 50'000 francs. La regenza prenda enconuschientscha
che l'impurtanza da la collecziun voluminusa da la fundaziun capauliana
n'è betg sco ultim il focus consequent sin il Grischun. Ella è da l'avis
che tala duai vegnir rendida accessibla ad in public interessà en moda
adequata.
- Federaziun grischuna per il sport: La regenza paja a la federaziun
grischuna per il sport ina contribuziun dal fond da sport da maximalmain
26'000 francs per conceder il premi grischun per il sport, per metter a
disposiziun ina infurmaziun giuridica sco er per autras activitads l'onn
2006.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun