Occurrenza d'infurmaziun dals 18 da schaner 2007 a Roten davart il plan per il svilup dal guaud da la Tumleastga-Mantogna  

16.01.2007
Il principi da l'onn 2006 è vegnì cumenzà cun la registraziun da las infurmaziuns da basa da la planisaziun per il svilup dal guaud concernent il territori da la Tumleastga-Mantogna. Tar quest territori tutgan las suandantas vischnancas: Almen, Cazas, Farschno, Flearda, Giuvaulta, Masagn, Pasqual, Pratval, Preaz, Purtagn, Roten, Sarn, Scharàns, Sched, Seglias, Tartar, Tràn, Tschappina, Tumegl, Tusaun, Urmagn e Veulden.
Il plan per il svilup dal guaud (PSG) è l'instrument da planisaziun dal servetsch forestal chantunal. El vegn elavurà da las inschigneras e dals inschigners forestals regiunals cun la cooperaziun da la populaziun. In PSG vegn fatg per ina regiun da planisaziun, e quai cun cumpigliar ils manaschis e las proprietads. El ha l'intent da mantegnair ils interess publics per il guaud e procura ch'il guaud po vegnir utilisà en moda persistenta er a lunga vista. Il plan per il svilup dal guaud circumscriva las finamiras forestalas e las intenziuns dal svilup forestal per l'entir areal da guaud e cuntegna ils princips che valan en general per la cultivaziun e per la tgira dal guaud.
A chaschun da l'occurrenza d'infurmaziun dals 18 da schaner 2007 a las 20.00 en la sala polivalenta a Roten vegn la gruppa da planisaziun ad orientar davart las finamiras e davart las incumbensas da la planisaziun per il svilup dal guaud, davart il cuntegn e davart la concepziun sco er davart las pussaivladads da cooperar. La cooperaziun da la publicitad gida cunzunt a registrar ils basegns per il guaud e per la cultivaziun, ad integrar enconuschientschas supplementaras, a vesair conflicts e basegns d'agir e tras quai a facilitar la realisaziun da las mesiras.
L'occurrenza d'infurmaziun è publica. La gruppa da planisaziun s'allegra d'ina viva participaziun.

Gremi: uffizi forestal dal Grischun
Funtauna: rg uffizi forestal dal Grischun