Navigation

Inhaltsbereich

  • Erste Mitteilung
  • Neuen Beitrag einfügen
Il departament d'economia publica e fatgs socials è vidlonder d'elavurar in'ulteriura basa per finanziar il marketing dal turissem. Las pretensiuns ch'èn vegnidas exprimidas fin ussa dal turissem e dal mastergn sco er da las partidas politicas vegnan integradas. Sco alternativa a la taxa turistica chantunala (TTC) vegnan examinadas tranter auter las tariffas da taxa sco er las variantas da lescha ch'èn previsas.

La refurma dal turissem grischun vegn considerada sco necessaria da tut las gruppas d'interess ed è pia incontestada. I vegn da princip medemamain renconuschì ch'igl è necessari da reveder la finanziaziun vertenta dal turissem tras las vischnancas. La dumonda, co che la finanziaziun duaja vegnir fatga, sparta las opiniuns. L'elavuraziun d'ina basa da discussiun per las variantas da la TTC dumonda dapli temp che previs. La consultaziun correspundenta vegn perquai lantschada probablamain en il 2. quartal da l'onn 2009.

Garantir la finanziaziun
Cun la nova structura da las destinaziuns, cun ina clera repartiziun da las incumbensas en il marketing e cun la nova orientaziun da Grischun vacanzas ha la refurma dal turissem grischun la finamira da franar la diminuziun da las pernottaziuns en il Grischun, d'acquistar ulteriurs giasts per il Grischun sco chantun da turissem e da mantegnair plazzas da lavur. Tras la repartiziun da las incumbensas ston las organisaziuns turisticas existentas fusiunar ad organisaziuns per la gestiun da destinaziuns (OGD) u ad organisaziuns turisticas futuras (OTF). En diversas regiuns vegnan actualmain furmadas destinaziuns. Las occurrenzas d'infurmaziun davart la TTC ch'han gì lieu questa stad per passa 400 represchentantas e represchentants dal mastergn, da l'economia e da la politica han mussà che la refurma dal turissem grischun vegn considerada sco necessaria e ch'ella è pia incontestada. Beneventada vegn er la garanzia a lunga vista da las adattaziuns structuralas cun agid d'in fundament solid per finanziar il marketing e la purschida turistica.

Examinar las variantas da la TTC
Pervia da las differentas opiniuns davart la finanziaziun dumonda l'elavuraziun da la lescha correspundenta sco er dals documents da consultaziun dapli temp che previs. Divers giavischs e diversas propostas ston vegnir examinads accuratamain. Ultra dal giudicament da las tariffas da taxa previsas, cuntegnan questas propostas er la consideraziun d'ina lescha generala sco alternativa a la TTC. La cuminanza d'interess turissem en il Grischun ITG sustegna l'introducziun d'ina TTC, postulescha dentant er variantas sco basa da discussiun. L'urari vegn adattà e la consultaziun correspundenta vegn lantschada probablamain en il 2. quartal da l'onn 2009.

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01

Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel