Ils 3 da december è la chatscha d'atun da l'onn current vegnida terminada en il Grischun.
Areguard ils tschiervs èn ils plans vegnids ademplids quasi cumplettamain. Cun la reducziun dals gronds effectivs e cun l'adattaziun a la capacitad dals quartiers d'enviern s'augmenta la schanza per il singul animal da surviver er durant in enviern dir.

Realisà la chatscha da tschiervs en moda effizienta ed entaifer paucs dis
Il plan da prelevaziun che preveseva da sajettar 4'450 tschiervs ha pudì vegnir ademplì cun agid da la chatscha d'atun en bunamain tut las regiuns dal chantun. Sulettamain en Engiadina bassa ed en Val Müstair ha la chatscha d'atun stuì vegnir interrutta pli baud pervia da las relaziuns d'enviern. Var 1'000 tschiervs èn vegnids sajettads durant las chatschas d'atun che han durà maximalmain 6 dis en mintga regiun. Quai permetta da stabilisar l'effectiv da tschiervs ch'è creschì levamain ils ultims onns ed er d'adattar quel effectiv, che duai passentar l'enviern, a la capacitad dal spazi da viver ch'è avant maun. Qua tras s'augmentan er las schanzas per mintga singul animal da surviver er durant in enviern dir. La chatscha d'atun gida ad evitar grondas perditas durant l'enviern ed uschia a reducir la quota da selvaschina disgraziada. A medem temp vegnan dentant er sminuids respectivamain impedids donns vi dal guaud e vi da culturas agriculas.

La chatscha da chavriels da la fin da l'atun ha cumenzà en moda tardivanta
Quai che vala per la chatscha da tschiervs, vala mo per part per la chatscha da chavriels. En differentas regiuns è la chatscha d'atun vegnida realisada er quest onn mo en moda tardivanta. La finamira è vegnida manchentada per var 300 animals, dentant cun grondas differenzas regiunalas. Sco che l'experientscha dals ultims onns mussa, datti talas differenzas regiunalas er durant il mez onn d'enviern tar la selvaschina disgraziada. Sch'i vegnan sajettads memia paucs animals, resultan bler dapli perditas durant l'enviern suandant.

En il Mesauc èn vegnids sajettads 5 portgs selvadis durant la chatscha d'atun
Tras quai che l'effectiv da portgs selvadis s'augmenta marcantamain en il Mesauc, crescha er il dumber d'animals sajettads. Durant la chatscha d'atun èn vegnids sajettads 5 portgs selvadis. Gia durant la chatscha auta eran vegnids sajettads 15 portgs selvadis.

Infurmaziuns:
- dr. Georg Brosi, manader da l'uffizi da chatscha e pestga dal Grischun, tel. 081 257 38 92
- Hannes Jenny, biolog da selvaschina, uffizi da chatscha e pestga dal Grischun,
tel. 081 257 38 93

Gremi: uffizi da chatscha e pestga
Funtauna: rg uffizi da chatscha e pestga