Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha prendì enconuschientscha da la petiziun "Betg tutgar il lavuratori a Bellinzona" ch'è vegnida lantschada en connex cun ils lavuratoris da las viafiers federalas a Bellinzona e ch'è vegnida inoltrada l'emna passada. En sia resposta al comité da petiziun declera la regenza ch'ella veglia trair a niz cumplainamain sia libertad d'agir per pussibilitar soluziuns che duain segirar plazzas da lavur. Plinavant menziunescha la regenza ch'ella sa participeschia a las tractativas da la maisa radunda e ch'ella haja exprimì cleras aspectativas en chaussa. La regenza era sa decidida da sa participar a la maisa radunda, perquai ch'il chantun Grischun fiss pertutgà fermamain, sch'il lavuratori da las viafiers federalas a Bellinzona vegniss serrà. Numerusas collavuraturas e numerus collavuraturs dal lavuratori a Bellinzona abitan en il Moesano, pia en il Grischun.
La petiziun è vegnida lantschada en il Grischun en connex cun l'iniziativa dal pievel tessinaisa "Betg tutgar ils lavuratoris: per la creaziun d'in center tecnologic-industrial en il sectur dal transport public" ed è la finala vegnida inoltrada ils 13 da matg 2008 a la regenza grischuna cun passa 1'000 suttascripziuns. La regenza sustegna las pretensiuns generalas da las petentas e dals petents.

Da vischnancas e da regiuns
Panaduz: La revisiun parziala da la constituziun communala da la vischnanca da Panaduz, ch'è vegnida concludida a la votaziun a l'urna dals 30 da mars 2008, vegn approvada.
Castaneda: La revisiun parziala da la constituziun communala da la vischnanca da Castaneda, ch'è vegnida concludida da la radunanza communala ils 16 d'avrigl 2008, vegn approvada.
Schnaus: La revisiun parziala da la constituziun communala da la vischnanca da Schnaus, ch'è vegnida concludida da la radunanza communala ils 11 d'avrigl 2008, vegn approvada.
Selma: La revisiun parziala da la constituziun communala da la vischnanca da Selma, ch'è vegnida concludida da la radunanza communala ils 30 da mars 2008, vegn approvada.

Contribuziuns chantunalas a differentas instituziuns
Agid umanitar: A la Caritas da la Svizra vegn pajada ina contribuziun da 20'000 francs a favur da l'acziun d'agid d'urgenza per las victimas da las inundaziuns en Burma.
Chasa da persunas attempadas e da tgira da l'Engiadin'ota, Samedan: Al circul da l'Engiadin'ota sco instituziun ch'è responsabla per la chasa da persunas attempadas e da tgira da l'Engiadin'ota a Samedan vegn garantida ina contribuziun chantunala da maximalmain 375'000 francs per installar in ascensur e per midar la construcziun entaifer la chasa da dimora.
Organisaziun turistica futura Viamala: A l'organisaziun turistica futura (OTF) Viamala vegn garantida ina contribuziun da 175'500 francs als custs da transfurmaziun.
Partenz turissem: A la ScRL Partenz turissem vegn garantida ina contribuziun da 170'000 francs als custs da transfurmaziun per furmar in'organisaziun turistica futura (OTF).
Promoziun da la cultura: La regenza ha concedì contribuziuns da totalmain 274'500 francs per promover 18 occurrenzas ed ovras culturalas.

Gremi: regenza
Funtauna: rg chanzlia chantunala dal Grischun
Neuer Artikel