Sessiun dal cussegl grond da l'onn 2012 extra muros: La conferenza da las presidentas e dals presidents dal cussegl grond sustegna la candidatura da la vischnanca da Samignun  

16.02.2011
A chaschun d'ina sesida che la conferenza da las presidentas e dals presidents dal cussegl grond ha gì dacurt, ha ella decidì da recumandar al cussegl grond d'acceptar la candidatura da la vischnanca da Samignun per realisar la sessiun da zercladur 2012 extra muros. Decider definitivamain davart la surdada decida il cussegl grond.

A chaschun d'ina sesida che la conferenza da las presidentas e dals presidents ha gì dacurt, è ella sa fatschentada cun las candidaturas per la sessiun da l'onn 2012 extra muros. Entaifer il termin ch'è vegnì publitgà l'atun 2010 èn entradas tschintg candidaturas da las suandantas candidatas: Arosa turissem, vischnanca da Mustér, regiun Grischun central cun Savognin sco lieu da sessiun, vischnanca da Puntraschigna e vischnanca da Samignun. Persvadì ha il dossier ch'è vegnì inoltrà da la vischnanca da Samignun. Per l'ina ademplescha la vischnanca da Samignun tut las pretensiuns, per l'autra sustegna er la Pro Engiadina bassa questa candidatura. Cumbain ch'er las autras candidatas han inoltrà fitg bunas candidaturas per realisar la sessiun da l'onn 2012 en lur regiun, è la conferenza da las presidentas e dals presidents tuttina stada da l'avis ch'il pachet cumplessiv da la vischnanca da Samignun e che l'ambient ch'è da spetgar a Samignun correspundian – cumparegliond tut las candidaturas ina cun l'autra – il meglier a l'idea d'ina sessiun dal cussegl grond extra muros. Decisiv è dentant stà ch'il cussegl grond è gia sa radunà a Mustér (1992), a Tavau (1992), a Landquart (1993) ed a Puschlav (2009), dentant anc mai en la regiun da l'Engiadina bassa.

En il senn da questa decisiun preliminara vegn la conferenza da las presidentas e dals presidents a suttametter al cussegl grond ina proposta correspundenta, per che quel possia decider definitivamain davart la surdada da la sessiun da zercladur 2012 extra muros. Quai vegn el probablamain a far en la sessiun d'avrigl 2011.


Infurmaziuns:
presidenta dal cussegl grond Christina Bucher-Brini, tel. 078 818 77 72


Gremi: conferenza da las presidentas e dals presidents dal cussegl grond
Funtauna: rg conferenza da las presidentas e dals presidents dal cussegl grond