Il nov center administrativ regiunal dal Grischun a Tusaun è oz vegnì inaugurà uffizialmain. La patruna da construcziun è l'assicuranza d'edifizis dal Grischun. Entaifer in onn e mez è la construcziun nova vegnida realisada da l'interpresa generala Implenia SA. Otg posts da servetsch chantunals cun circa 40 plazzas da lavur èn ussa concentrads en in lieu.

Tenor la strategia chantunala d'immobiglias duain vegnir realisads en tut il Grischun tut en tut nov centers regiunalas en lieus che furman gia ussa centers administrativs. Ils emprims centers a Glion ed a Roveredo èn gia en funcziun ed èn sa cumprovads en la pratica. A Scuol, a Tavau ed a Landquart è previsa l'avertura per il cumenzament da l'onn 2014. Alura suondan ils centers a Puschlav, a Samedan ed a Cuira.

A Tusaun pon ils otg posts da servetsch chantunals, ch'èn sparpagliads oz en set differents lieus, vegnir concentrads en in nov edifizi d'administraziun cun var 40 plazzas da lavur. Uschia pon vegnir cuntanschidas sinergias impurtantas e spargnads custs. Tar quests posts da servetsch tutgan biros da l'uffizi da stimaziun, da la segirezza da victualias e da la sanadad d'animals, da la direcziun da construcziun da l'uffizi da construcziun bassa, da l'inspecturat da scola e da scolina dal district Plessur-Grischun central, dal servetsch psicologic da scola, da la cussegliaziun da professiun, da studi e da carriera cun il center d'infurmaziun professiunala, dal center regiunal per intermediaziun da lavur sco er da la polizia chantunala dal Grischun.

Edifizi d'administraziun nov e modern
En il sid dal territori central da Tusaun, a la Feldstrasse / Obere Stallstrasse, ha la vischnanca da Tusaun mess a disposiziun in bain immobigliar en il dretg da construcziun. Il nov center administrativ regiunal è vegnì construì e finanzià da l'assicuranza d'edifizis dal Grischun (GVG). Per survegnir sbozs è vegnida realisada l'onn 2009 ina incumbensa da studi cun ina purschida da prestaziun totala. La victura è stada l'interpresa generala Implenia SA cun il biro d'architectura Gredig Walser. Cun la realisaziun èsi vegnì cumenzà l'avrigl 2010. Ils 26 da settember 2011 ha il chantun sco locatari / utilisader pudì surpigliar l'edifizi entaifer il termin fixà.

Il stabiliment sa distingua tras ina moda da construcziun funcziunala e persistenta e tras ina furma cumpacta. La purschida da localitads da lavur che correspunda als basegns, l'avertura optimala tras la halla interna sco er l'observaziun da grondas pretensiuns a la qualitad da la construcziun e la moda ecologica da construir (certificaziun sco edifizi Minergie-P-Eco®) furma la basa per in edifizi administrativ effizient e progressiv.

Grazia a l'engaschament ed a la collavuraziun excellenta tranter la patruna da construcziun, ils utilisaders, ils planisaders, las interpresas e la vischnanca da Tusaun han pudì vegnir cuntanschidas las finamiras dal project tant en quai che reguarda la qualitad, ils custs sco er ils termins.

Di da la porta averta: venderdi, ils 28 d'october 2011, vegn il center ad esser accessibel a la publicitad interessada, e quai da las 15.00 fin a las 19.30.


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31
- Paul Cathomen, vicedirectur da l'assicuranza d'edifizis dal Grischun, tel. 081 257 39 02


Gremi: uffizi da construcziun auta dal Grischun
Funtauna: rg uffizi da construcziun auta dal Grischun