La cumissiun per furmaziun e cultura sustegna la participaziun finanziala dal chantun Grischun a las investiziuns da renovaziun da la NTB  

21.11.2011
La cumissiun per furmaziun e cultura dal cussegl grond ha predeliberà la missiva da la regenza concernent la participaziun dal chantun Grischun a la finanziaziun da las investiziuns da renovaziun da la Scola auta interstatala per tecnica (NTB) a Buchs e recumonda al cussegl grond dad approvar il credit d'impegn respectiv da 2,6 milliuns francs.

En sia ultima sesida ha la cumissiun per furmaziun e cultura – sut il presidi da deputada Sandra Locher Benguerel ed en preschientscha da cusseglier guvernativ Martin Jäger – concludì unanimamain da proponer al cussegl grond la participaziun dal chantun Grischun a la finanziaziun da las investiziuns da renovaziun da la NTB e da deliberar per quai in credit d'impegn da 2,6 milliuns francs. Las investiziuns da renovaziun planisadas che cumpiglian indrizs, apparats da labor ed in edifizi d'engrondiment importan totalmain 17,7 milliuns francs. Da quels resultan proporziunalmain 2,6 milliuns francs per il chantun Grischun. La cumissiun è sa fatga in maletg da la situaziun al lieu ed è sa laschada infurmar. Ella ha pudì sa persvader che las investiziuns da renovaziun planisadas èn adequatas e necessarias, perquai che la NTB è dependenta d'ina buna infrastructura per pudair garantir l'existenza da ses trais secturs da cumpetenza ils pli impurtants, numnadamain ils sistems d'energia, la microtecnologia e nanotecnologia sco er la tecnica per mesirar la producziun.

Duai il chantun Grischun sa retrair sco purtader da la NTB?
La NTB è in institut autonom da dretg public cun in'atgna persunalitad giuridica che vegn purtà dals chantuns Son Gagl e Grischun sco er dal principadi da Liechtenstein. Il medem mument è la NTB ina scola parziala da la Scola auta spezialisada da la Svizra orientala ch'è da sia vart ina fusiun sin basa d'in concordat da duas ulteriuras scolas parzialas sco er da la SATE a Cuira. Perquai ch'il chantun Grischun sco purtader da la NTB sto gidar a finanziar per l'ina il surpli d'expensas e per l'autra – sco mussà – las investiziuns da renovaziun, fissi ord vista dal Grischun pli favuraivel da sa retrair da la NTB e da pajar correspundentamain mo pli ils daners da scola per las Grischunas e per ils Grischuns che studegian a la NTB. Perquai cuntegna la missiva er ina proposta da la regenza, cun la quala ella vuless vegnir incumbensada dal cussegl grond da preparar la retratga dal chantun Grischun sco purtader da la NTB. Quai deliberass meds finanzials che pudessan vegnir impundids per scolas autas e per instituziuns da perscrutaziun en il chantun Grischun.
La cumissiun po chapir ils arguments da la regenza. Per betg far in pass che avess consequenzas negativas per las studentas e per ils students grischuns sco er per il Grischun – cun sias scolas autas spezialisadas – sco lieu da furmaziun e sco lieu economic na vuless la cumissiun betg gia avair preparà la retratga, mabain mo laschar examinar l'extrada. En quest connex fa ella al cussegl grond ina proposta da midada respectiva.

Il cussegl grond vegn a tractar questa fatschenta en la sessiun da december 2011.


Infurmaziuns:
presidenta da la cumissiun Sandra Locher Benguerel, tel. 079 658 13 53


Gremi: cumissiun per furmaziun e cultura
Funtauna: rg cumissiun per furmaziun e cultura