L'indriz da microfons e d'autpledaders existent en l'edifizi dal cussegl grond a Cuira n'ademplescha betg pli sias funcziuns e sto vegnir remplazzà urgentamain. L'indriz è vegl ed i na dat nagins tocs da reserva pli. En in'enquista realisada la primavaira 2011 en quest connex èn tut las tschintg fracziuns dal cussegl grond s'exprimidas a favur d'in nov indriz da votaziun electronic. En il rom da ses process da fixar il preventiv ha il cussegl grond approvà in credit correspundent en la sessiun da december 2011. Remplazzond ed adattond tut las installaziuns electricas da l'edifizi dal cussegl grond po er vegnir realisà a medem temp in indriz da votaziun electronic. Cun quest indriz vegn simplifitgà il proceder da votaziun en il cussegl grond, ed il cumportament da las deputadas e dals deputads a chaschun da votaziuns daventa pli transparent. A medem temp vegn l'illuminaziun adattada a las normas ed als basegns actuals e remplazzada tras glischs da LED che spargnan energia. Ultra da quai vegn installà in indriz d'alarm d'incendi. Las lavurs premettan ina sanaziun interna da la sala dal cussegl grond sco er in'adattaziun dals plazs da lavur.

Da la fin da la sessiun d'avrigl fin il cumenzament da la sessiun d'avust 2012 vegnan realisadas las lavurs da construcziun. Durant quest temp vegn l'edifizi dal cussegl grond serrà. Sco quai ch'igl è gia enconuschent ha la sessiun da zercladur dal cussegl grond lieu "extra muros" a Samignun (dals 11 fin ils 14 da zercladur 2012).


Infurmaziuns:
- Ueli Bleiker, president dal cussegl grond dal chantun Grischun, tel. 081 650 11 36
- Markus Dünner, architect chantunal, uffizi da construcziun auta, tel. 081 257 36 31


Gremi: Uffizi da construcziun auta
Funtauna: rg uffizi da construcziun auta