Communicaziun da la regenza dals 3 da matg 2012  

03.05.2012

La regenza grischuna ha avert la consultaziun tar ina revisiun totala da la lescha davart la cassa da pensiun chantunala dal Grischun.

La basa giuridica per la cassa da pensiun chantunala vegn adattada
La lescha davart la cassa da pensiun chantunala dal Grischun sto vegnir revedida totalmain pervia da las novas disposiziuns federalas. La regenza grischuna ha tramess en consultaziun in sboz da lescha correspundent. La consultaziun dura fin ils 31 da fanadur 2012.

Dapi il cumenzament dal nov millenni èn ils relaschs da la cassa da pensiun chantunala dal Grischun vegnids suttamess a quatter revisiuns parzialas e totalas. Ils puncts principals da questas revisiuns èn stads la midada al primat da contribuziun, la creaziun d'ina lescha davart la cassa da pensiun (pli baud ordinaziun davart la cassa da pensiun), la finanziaziun da la cassa a 100 pertschient (senza la dar ina reserva en cas da midadas da la valur) sco er l'independenza da la cassa e la distatgada da la cassa or da l'administraziun centrala dal chantun. Tras questas revisiuns sin plaun chantunal èn vegnids realisads gia ordavant aspects fundamentals dal dretg naziunal.
Nov è percunter ch'il legislatur po relaschar per las instituziuns da prevenziun da dretg public – tenor il dretg federal – mo pli ubain las disposiziuns davart las prestaziuns ubain las disposiziuns davart la finanziaziun, dentant betg omadus geners da disposiziuns. En il sboz da consultaziun vegni proponì ch'il cussegl grond sco legislatur fixeschia las contribuziuns per constituir las prestaziuns da vegliadetgna, entant che la cumissiun administrativa sco organ suprem da la cassa da pensiun chantunala dal Grischun determineschia las prestaziuns d'assicuranza. Il legislatur federal deleghescha da nov ina retscha d'incumbensas nunprivablas ed intransferiblas a la cumissiun administrativa.
Tenor il dretg federal èsi vinavant pussaivel da tscherner ina chapitalisaziun parziala da la cassa da pensiun. La regenza cusseglia da desister da quai. Tar la cassa da pensiun chantunala dal Grischun èn tut las stentas stadas drizzadas ils ultims onns sin ina chapitalisaziun cumplaina. Ils 31 da december 2011 aveva la cassa in grad da garanzia da 98 pertschient.
(Link als documents da consultaziun)

La cassa da pensiun chantunala dal Grischun è in institut autonom da dretg public chantunal. Ad ella èn affiliads 224 patrunas e patruns (chantun, instituts chantunals, vischnancas, corporaziuns da vischnancas e da scola). Ella ha 7'810 persunas assicuradas activas e paja var 3'000 rentas (stadi da l'onn 2011).


Da vischnancas e da regiuns

  • Rossa: A la vischnanca da Rossa vegn garantida ina contribuziun pauschala da 198'000 francs per renovar e per engrondir il provediment d'aua. Quai cun resalva d'ina contribuziun federala. 
  • Trimmis: La revisiun parziala da la constituziun communala da la vischnanca da Trimmis dals 11 da mars 2012 vegn approvada.

 
Contribuziuns chantunalas a differentas instituziuns
Organisaziun da tetg da las uniuns da pumicultura dal Grischun:
Per l'acziun da plantar bostgs cun bist aut 2012/2013 vegn concedida ina contribuziun chantunala da 50'000 francs a favur da l'organisaziun da tetg da las uniuns da pumicultura dal Grischun.


Projects da vias
La regenza ha approvà 4'190'000 francs per lavurs da construcziun sin ils suandants trajects:
- via naziunala A28: lavurs d'impressari, sviament da Saas
- via dal Güglia: lavurs da cuvrida, Mot – Sur Gonda
- via da Scharàns: lavurs d'impressari, aual da Clusa – Scharàns
- via da Valleina: lavurs d'impressari, via da la Mantogna dador – Valleina


Gremi: regenza
Funtauna: rg chanzlia chantunala dal Grischun