Navigation

Inhaltsbereich

  • Erste Mitteilung
  • Neuen Beitrag einfügen

Per motivs dal dretg public n'è la regenza grischuna betg entrada en in recurs da votaziun inoltrà suenter la votaziun a l'urna dals 11 da mars 2012. Plinavant ha ella tractà differentas fatschentas da las vischnancas, uschia per exempel la basa da la planisaziun d'utilisaziun communala per in territori da skis Arosa-Lai.

La dretgira administrativa vegn a decider davart il recurs da votaziun
Suenter la votaziun chantunala dal pievel dals 11 da mars 2012 concernent in credit per la construcziun d'in nov center administrativ chantunal – project "sinergia" è – renviond a malsegirezzas ch'existan davart la via giudiziala – vegnì inoltrà in recurs cunter la votaziun tant tar la regenza sco er tar la dretgira administrativa dal chantun Grischun. En quella vegnì pretendì d'abolir la votaziun resp. da declerar la votaziun sco nunvalaivla. Crititgadas vegnan las explicaziuns da votaziun dal cussegl grond. Sin proposta da la regenza è la dumonda da la cumpetenza vegnida discutada cun la dretgira administrativa. Tuttas duas autoritads èn stadas unanimamain da l'avis che la dretgira administrativa saja – per motivs da la politica da stadi e dal dretg public – cumpetenta da tractar quest recurs da votaziun e betg la regenza. Perquai ha la regenza concludì da betg entrar en il recurs da votaziun.

Relaschà duas novas ordinaziuns
La regenza ha relaschà in'ordinaziun davart il subvenziunament d'edifizis en la furmaziun professiunala, en purschidas da la furmaziun cuntinuanta e da scolas autas. En quella vegnan fixadas las disposiziuns che valan en il sectur da la furmaziun professiunala concernent la garanzia da contribuziuns dal maun public e ch'èn differentas da talas dal sectur da la scola populara. En il sectur da la furmaziun professiunala pon sanaziuns explicitamain vegnir messas a quint per contribuziuns da construcziun e la tariffa da contribuziun na dependa betg da la forza finanziala da la vischnanca respectiva.
Ultra da quai ha la regenza concludì in'ordinaziun davart l'incassament da multas disciplinaras tar cuntravenziuns cunter l'ordinaziun davart il parc naziunal. Uschia pon cuntravenziuns minimalas cunter las prescripziuns da l'ordinaziun davart il parc naziunal vegnir liquidadas en il futur en ina procedura simpla da multas disciplinaras.

Ovras da protecziun vegnan renovadas per 6,6 milliuns francs
Per reparar construcziuns che protegian cunter privels da la natira en il chantun ha la regenza deliberà in project collectiv en la dimensiun da 6,6 milliuns francs. Uschia vegnan ovras da protecziun existentas mantegnidas en il standard architectonic vertent e l'effect dals stabiliments vegn meglierà. Il project collectiv cuntegna 47 objects, tar ils quals ston vegnir sanads ils fundaments, remplazzadas parts destruidas, renovadas construcziuns da sustegn e reparads ils sistems da drenascha. En tscherts cas vegn er augmentada la capacitad da chargia da las ovras da protecziun. Las lavurs da renovaziun duran 2 onns.

Da vischnancas e da regiuns

  • Tschiertschen-Praden e Vaz: La regenza ha approvà la basa da la planisaziun d'utilisaziun da las duas vischnancas da Tschiertschen-Praden e da Vaz per colliar ils territoris da skis dad Arosa e da Lai. Quella è mintgamai vegnida approvada da las votantas e dals votants da las duas vischnancas cun ina revisiun parziala da la planisaziun locala ils 28 d'october 2011 respectivamain ils 27 da november 2011. Las proceduras d'approvaziun èn vegnidas coordinadas e realisadas parallelamain.
    Gia concludì ha la regenza l'adattaziun dal plan directiv chantunal sco er dals plans directivs regiunals dal Grischun central e dal Grischun dal nord concernent la colliaziun dals territoris da skis Arosa – Lai (communicaziun da la regenza dals 22 da december 2011). Ultra da la procedura da la planisaziun dal territori è necessaria – per realisar la fusiun dals territoris da skis – ina procedura dal dretg da telefericas per l'approvaziun dal plan e per la concessiun tar la confederaziun. En questa procedura vegn er fatga l'examinaziun ecologica.
  • Rossa: La revisiun parziala da la planisaziun locala, concludida da la vischnanca da Rossa ils 18 da december 2010, vegn approvada cun resalvas. La revisiun parziala cumpiglia ina nova lescha da construcziun, la rectificaziun da las zonas da privel a Santa Domenica pervia da las mesiras da protecziun cunter crudada da crappa ch'èn vegnidas realisadas, l'installaziun d'ina zona per deponias da material a Pighé sper Augio, la creaziun da las premissas da la planisaziun dal territori per realisar in center da sport, da turissem e da recreaziun cun in campadi ad Aug da Ross sper Augio sco er la rectificaziun da la zona per il sport d'enviern a Rossa.
  • Tujetsch: Il project per in rempar dal Drun da la vischnanca da Tujetsch vegn approvà cun cundiziuns. Als custs vegn garantida ina contribuziun chantunala da maximalmain 73'800 francs.
  • Schiers: Als custs supplementars per renovar las vias champestras al Stelserberg vegn – cun resalva d'ina contribuziun federala – garantida ina contribuziun chantunala da maximalmain 48'189 francs.
  • Arvigo: A la vischnanca dad Arvigo vegn garantida ina contribuziun pauschala da 135'000 francs per renovar e per engrondir il provediment d'aua. Quai cun resalva d'ina contribuziun federala.
  • Valsot: La constituziun da la nova vischnanca grischuna da Valsot dals 20 d'avrigl 2012 vegn approvada. La constituziun communala entra en vigur il 1. da schaner 2013. La vischnanca da Valsot resulta da la fusiun da las duas vischnancas da Ramosch e da Tschlin en Engiadina bassa.
  • Grono: La revisiun parziala da la planisaziun locala da la vischnanca da Grono dals 18 da december 2011 vegn approvada.
  • Riom-Parsonz: La constituziun da la vischnanca da Riom-Parsonz dals 25 d'avrigl 2012 vegn approvada.
  • Consorzi per aua persa dal Partenz central: La revisiun parziala dals statuts dal Consorzi per aua persa dal Partenz central vegn approvada

.
Projects da vias
La regenza ha approvà 1'450'000 francs per lavurs da construcziun sin ils suandants trajects:
- via da la Tumleastga: lavurs d'impressari, portal da sid dal tunnel fin a la via veglia da Tràn 
- via sursilvana: lavurs da cuvrida, traject Cresta

Gremi: regenza
Funtauna: rg chanzlia chantunala dal Grischun

Neuer Artikel