La regenza grischuna ha permess al center da furmaziun Surselva da porscher in ulteriur champ da professiun a la scola media professiunala.
Scola media professiunala dal center da furmaziun Surselva cun il champ da professiun pedagogia
Il center da furmaziun Surselva a Glion po manar a partir da l'onn da scola 2013/14 a sia scola media professiunala – ultra dal champ da professiun sanadad – il champ da professiun pedagogia. La regenza ha dà la permissiun respectiva. Resalvada resta la renconuschientscha dals certificats da scolaziun tras la conferenza svizra da las directuras e dals directurs chantunals da l'educaziun publica (CDEP). L'introducziun dal champ da professiun pedagogia a la scola media professiunala duai gidar ad augmentar l'attractivitad da la purschida da scolaziun en il center da furmaziun Surselva. Per il champ da furmaziun sanadad desista la scola media professiunala ultra da quai en il futur da collavurar cun la scola chantunala grischuna.
Da vischnancas e da regiuns
- Mustér: La revisiun parziala da la constituziun da la vischnanca da Mustér dals 3 da mars 2013 vegn approvada. Il motiv per la revisiun è stada la futura elecziun a l'urna da la cumissiun da gestiun (fin ussa tras il parlament communal) ch'è reussida pervia d'ina iniziativa.
- Haldenstein: La revisiun parziala da la constituziun da la vischnanca da Haldenstein dals 23 da november 2012 vegn approvada.
- Seglias: La revisiun parziala da la constituziun da la vischnanca da Seglias dals 26 da mars 2013 vegn approvada. Reglada da nov è vegnida la cumpetenza per l'elecziun, per l'engaschament e per la relaschada da las persunas d'instrucziun e da la direcziun da la scola (da nov tras la suprastanza communala ensemen cun il cussegl da scola, fin ussa unicamain tras il cussegl da scola).
Projects da vias
La regenza ha approvà 2 783 000 francs per lavurs da construcziun sin ils suandants trajects:
- A28, via naziunala Partenz: conduct d'idrants en il tunnel dal sviament da Küblis
- via dal Güglia: lavurs d'impressari tar la punt "Güstia"
- via da Surin: lavurs da cuvrida, punt dal Glogn – Surin
Gremi: regenza
Funtauna: rg chanzlia chantunala dal Grischun