Navigation

Inhaltsbereich

  • Erste Mitteilung
  • Neuen Beitrag einfügen
Cun l'avertura dal center chantunal d'infurmaziun per l'integraziun (InfoInt) che ha gì lieu oz, stat a disposiziun a la populaziun indigena ed estra ina purschida d'infurmaziun cumplessiva ed accessibla publicamain per dumondas en connex cun il tema da l'integraziun en il sectur da migraziun.

La migraziun tutga tar il mintgadi en il Grischun ed uschia vivan actualmain var 34 000 burgaisas estras e burgais esters da 130 pajais en il chantun. A l'infurmaziun sistematica e correcta vegn dà in grond pais en la politica d'integraziun da la Svizra. Cun metter en pe il center d'infurmaziun per l'integraziun (InfoInt) dal Grischun en las localitads dal post spezialisà per l'integraziun en la Engadinstrasse 24 a Cuira duai vegnir facilità a tut las parts interessadas dal Grischun l'access ad infurmaziuns ch'èn relevantas per l'integraziun e per la migraziun. La finamira è quella da sa drizzar a la populaziun indigena ed estra, ma er a las autoritads ed a las instituziuns cun in vast spectrum d'infurmaziuns e da documentaziuns sco er da garantir il sustegn necessari cun ina cussegliaziun persunala. 

Infurmaziuns per tuts dad A fin Z
Il team dal center d'infurmaziun per l'integraziun infurmescha e cusseglia en cas da dumondas sco: Nua chat jau in curs da lingua per mes collega da lavur da lingua estra? Jau sun nov en il Grischun e tschertg infurmaziuns per pudair m'arranschar svelt qua. Co planisesch jau in project d'integraziun en mia vischnanca? En il senn d'in post da triascha renviescha il team en cas da basegn als posts cumpetents ed a las spezialistas ed als spezialists en il chantun. Plinavant datti en l'infoteca ina gronda tscherna da broschuras d'infurmaziun davart temas impurtants dal mintgadi en differentas linguas, ma er litteratura spezialisada, revistas e DVD che pon ubain vegnir retratgas gratuitamain ubain emprestadas
Ultra da quai vegn purschida ina cussegliaziun linguistica individuala ed igl exista actualmain la pussaivladad da far in test da classificaziun per emprender tudestg. 
Il center d'infurmaziun per l'integraziun (InfoInt) dal Grischun è avert ils suandants dis: mardi 10.00–12.30 e 14.00–16.30, mesemna 13.30–17.00 sco er gievgia 11.00–18.45 (cun cussegliaziun linguistica).

Ulteriuras infurmaziuns davart il center d'infurmaziun per l'integraziun chattais Vus sin noss portal d'internet sut www.integration.gr.ch. Quel porscha ultra da quai infurmaziuns davart las basas da la politica d'integraziun dal Grischun, davart las purschidas d'integraziun existentas u davart il viver ed il lavurar en il Grischun resp. en Svizra. Da nov stattan a disposiziun sut la rubrica "Da nov en il chantun" er datotecas auditivas che pon vegnir tadladas en albanais, arab, bosniac/croat/serb, tudestg, englais, franzos, talian, portugais, russ, spagnol, tamil e tirc e che dattan introducziuns en ils temas impurtants sco la lavur, la scola, la sanadad, l'integraziun e.u.v. 
 

Infurmaziuns:
- Marcel Suter, manader da l'uffizi da migraziun e da dretg civil, tel. 081 257 25 21, e-mail Marcel.Suter@afm.gr.ch  
- Patricia Ganter, incumbensada chantunala d'integraziun e manadra dal post spezialisà per l'integraziun, tel. 081 257 36 81, e-mail Patricia.Ganter@afm.gr.ch 
  

Gremi: uffizi da migraziun e da dretg civil
Funtauna: rg uffizi da migraziun e da dretg civil
Neuer Artikel