Sco funtauna d'energia regenerabla gioga l'utilisaziun da la forza idraulica in rolla impurtanta en Svizra – ed en spezial er en il Grischun. Davart quest tema datti ussa in nov film curt da la chanzlia chantunala dal Grischun sin www.gr.ch.

La part da la forza idraulica vi da l'entira producziun d'electricitad en Svizra (circa 56 pertschient) ed en il chantun Grischun (circa 98 pertschient) è considerabla. Actualmain ha questa funtauna d'energia in temp difficil, ed ella è en in dilemma: D'ina vart duai la forza idraulica – en consequenza da la vieuta energetica instradada da la politica – furnir ina contribuziun considerabla per garantir il basegn supplementar d'energias regenerablas. Da l'autra vart è ella actualmain suttamessa ad ina crudada dals pretschs. Ils pretschs d'electricitad sin il martgà d'electricitad europeic èn pli bass che mai ed han consequenzas directas er per ils pretschs en Svizra ed en il Grischun.

En il Grischun ha la forza idraulica anc adina ina gronda impurtanza per l'economia publica. Ella furnescha ina contribuziun impurtanta al provediment d'energia indigen, segirescha plazzas da lavur en pliras regiuns da noss chantun e generescha taxas periodicas annualas per mauns da la communitad grischuna. Questa facultad da l'economia publica duai vegnir segirada a lunga vista, per ch'er nossas generaziuns vegnintas possian profitar da tala. La regenza grischuna ed ils posts chantunals cumpetents èn persvadids che la forza idraulica gioghia er vinavant ina rolla impurtanta. Dapli infurmaziuns en chaussa cuntegna il film curt da la chanzlia chantunala. 
 
Remartga:
Davart quest tema stat a disposiziun in video sut www.gr.ch. 
 

Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail mario.cavigelli@bvfd.gr.ch  
 

Gremi: departament da construcziun, traffic e selvicultura
Funtauna: rg departament da construcziun, traffic e selvicultura