Hannes e Petruschka Vogel èn ils purtaders dal premi grischun da cultura 2014. Ultra dal premi grischun da cultura 2014 ha la regenza surdà diesch premis da renconuschientscha sco er otg premis da promoziun. 

Il premi grischun da cultura 2014 per Hannes e Petruschka Vogel
Hannes e Petruschka Vogel èn ils purtaders dal premi grischun da cultura 2014. La regenza grischuna ha surdà il premi grischun da cultura 2014 al pèr artistic che viva a Maton. Hannes e Petruschka Vogel survegnan ensemen il premi en appreziaziun da lur lavur artistica renconuschida sin plaun internaziunal en ils secturs da la pictura, da la fotografia, da l'art textual e conceptual che metta ovras esteticamain persvadentas en connexs sensitivs che tegnan quint da l'impurtanza speziala dal lieu e da sias dimensiuns istoricas. Il premi è dotà cun totalmain 30 000 francs.

Plinavant ha la regenza concedì ils suandants premis da renconuschientscha da mintgamai 20 000 francs a:
- Walter J. Ammann, Tavau, en appreziaziun da ses projects directivs e renconuschids sin plaun internaziunal en il sectur da la perscrutaziun da ristgas e dals privels da la natira sco er da ses engaschament instancabel per rinforzar Tavau ed il Grischun sco lieu da perscrutaziun
- Evelina Cajacob, Malans, en renconuschientscha da sia activitad artistica sin il champ dal dissegn e da l'installaziun da video che entretscha mintgadi ed art en maniera sensitiva
- Flurin Caviezel, Cuira, en renconuschientscha da sia activitad sco cabarettist, musicist e raquintader e per sia funcziun sco ambassadur pluriling ordaifer il chantun Grischun
- Agnese Ciocco, Roveredo, en renconuschientscha da sia activitad multifara da blers onns a favur da la cultura dal Mesauc e dal Grischun talian e particularmain da ses engaschament per il Museo Moesano
- Hans Domenig, Cuira, en appreziaziun da sia activitad sco teolog, fotograf ed autur che intimescha cun sias fotografias e ses texts aforistics da reflectar davart la filosofia dal mintgadi
- Peter Egloff, Sumvitg, en renconuschientscha da sia activitad publicistica multifara en favur da lingua e cultura e per sias prestaziuns sco traductur subtil da litteratura rumantscha
- Konrad Kunz, Cuira, en appreziaziun da sia activitad da blers onns sco graficher e dissegnader, en spezial en il sectur da la concepziun da cudeschs e d'exposiziuns per differentas instituziuns en il Grischun
- Cornelia Müller, Puschlav, en appreziaziun da sia activitad engaschada per l'intermediaziun da jazz, da musica improvisada e dad etnomusica sco er da ses engaschament instancabel ed ardent per l'organisaziun dal festival avantgardistic UNCOOL Valposchiavo
- Christian ed Ursula Weber, Trun, en appreziaziun da lur activitad idealistica da blers onns en il sectur da l'agricultura ecologica e da l'administraziun persistenta da resursas sco er da lur engaschament per il mantegniment da la diversitad da las spezias en il Grischun
- Maria Riccarda Wesseling, Amstelveen NL, en appreziaziun da sias prestaziuns extraordinarias sco mezzosopranista sco er da sia funcziun sco ambassadura dal Grischun en Svizra ed a l'exteriur

Ils premis da promoziun da mintgamai 20 000 francs van quest onn a:
- Mileva Albertini, Lostallo, illustratura
- Jon Bischoff, Turitg, disegnader da comics
- Notta Caflisch, Cuira, artista figurativa
- Carlo Clopath, Trin Mulin, designer
- Anita Hassler, Berna, musicista
- Martin Jud, Cuira, dirigent da chor e d'orchester
- Annatina Kull, Lucerna, musicista
- Jürg Wasescha, Savognin, musicist da baselgia

Ils premis vegnan surdads en il rom d'ina festa che ha lieu venderdi, ils 14 da november 2014, a las 17.15 en la sala dal cussegl grond a Cuira. 

Medias e medis d'assistenza en scolaziun tar medias e medis da chasa
Il chantun cuntinuescha cun il program "Capricorn", lantschà l'onn 2009, per stgaffir plazzas da scolaziun per medias e medis d'assistenza en praticas da medias e medis da chasa. La regenza ha approvà ina cuntinuaziun illimitada dal program che chaschuna custs annuals da maximalmain 300 000 francs per il chantun. La finamira dal program è quella da mitigiar la mancanza da medias e medis da chasa cun scolar durant in mez onn medias e medis d'assistenza, che lavuran en ils ospitals, tar medias e medis da chasa. A partir da l'onn 2015 stattan mintga onn a disposiziun plazzas d'assistenza en 6 praticas (fin ussa 4) da differentas provedidras e differents provediders da basa en il chantun. Las medias ed ils medis d'assistenza vegnan dispensads da l'ospital per la durada da questa scolaziun. Durant quest temp paja il chantun 75 pertschient dals custs da salari, l'ospital ils 25 pertschient restants. Il project ha fin ussa gì success. Mintga onn èn s'annunziads dapli medias e medis d'assistenza che quai ch'igl èn vegnidas messas a disposiziun plazzas. Fin la fin da l'onn 2013 han gia trais provediders da basa ed ina media d'uffants avert ina pratica en il Grischun. 

Approvà da princip la segunda missiva federala davart la cultura
La regenza grischuna beneventa la missiva federala davart la cultura per ils onns 2016-2019 (segunda missiva davart la cultura). La missiva davart la cultura determinescha las finamiras e las mesiras e fixescha ils meds finanzials che vegnan attribuids a las instituziuns culturalas da la confederaziun durant la nova perioda da promoziun. I èn previs meds finanzials da tut en tut 894,6 milliuns francs. En sia posiziun renda la regenza grischuna attent a divers puncts: La regenza resguarda quai sco incumbensa da la confederaziun da sa participar pli fitg a la promoziun da la lavur culturala viventa resp. da projects culturals excellents gist er en regiuns ruralas. Cun preoccupaziun prenda la regenza ultra da quai enconuschientscha dal fatg ch'i na vegnan deliberads – malgrà in preventiv pli grond per la nova perioda da promoziun – nagins meds finanzials supplementars per la tgira da monuments, per l'archeologia e per la protecziun dal lieu. Per che la destrucziun latenta ed ils donns ils pli gronds vi da lieus da chats archeologics e vi da la cultura architectonica svizra possian vegnir impedids, dovra il sectur da la protecziun da la patria e da la tgira da monuments in import annual da la confederaziun d'almain 30 milliuns francs (actualmain èn quai 22 milliuns francs per projects concrets). Supplementarmain vegn proponida ina promoziun en la dimensiun da 5 milliuns francs per mantegnair e per tgirar ils lieus dal patrimoni mundial da la UNESCO. Plinavant beneventa la regenza la creaziun dal nov artitgel davart la "participaziun culturala", en il qual è er resumada la furmaziun musicala. 
 

Da vischnancas e da regiuns

• Guarda: La revisiun parziala da la planisaziun locala, concludida da la vischnanca da Guarda il 1. da matg 2014, vegn approvada. Cun la revisiun parziala vegnan realisadas midadas en la zona per stabiliments publics per crear plazzas da parcar.

 
 
Gremi: regenza
Funtauna: rg chanzlia chantunala dal Grischun