A chaschun da la fiera da tscherna da professiun FIUTSCHER da quest onn che ha lieu dals 5 fin ils 9 da november 2014 en la halla da la citad da Cuira sa preschenta il post da stab chantunal per l'egualitad da las schanzas cun in'acziun speziala: En la lounge da la tscherna da professiun ed al stan sa preschentan 20 ambassaduras ed ambassadurs giuvens dal Grischun cun lur professiun extraordinaria e discutan cun giuvenils, cun persunas d'instrucziun e cun geniturs.
 
I dat numerusas mattas cun talents artisanals e tecnics e tuttina blers mats ch'èn fitg communicativs e sensibels. Ma la gronda part dad ellas ed els van tar la tscherna da professiun vias zappitschadas. Uschia tschernan var 70 pertschient da las mattas mo gist tranter diesch differentas professiuns ed emprendan il pli gugent da secretaria, da vendidra u da coiffeusa. Ed ils mats fan l'emprendissadi d'electricher, da scrinari u da mecanist d'autos. Uschia restrenschan ellas sezzas ed els sezs nunnecessariamain lur schanzas per in emprendissadi interessant. Ellas ed els suondan maletgs dads e manchentan eventualmain la professiun che correspundess il meglier a lur abilitads ed a lur giavischs.
Durant l'exposiziun professiunala grischuna per la furmaziun fundamentala ed il perfecziunament professiunal FIUTSCHER che ha lieu dals 5 fin ils 9 da november 2014 en la halla da la citad da Cuira fa il post da stab chantunal per l'egualitad da las schanzas reclama per ina tscherna da professiun pli averta, pli curaschusa e pli multifara. Al stan dal post da stab sa preschentan umans giuvens cun ina tscherna da professiun atipica. Las ambassaduras giuvnas emprendan per exempel da polimecanista, da constructura, d'informaticra, da logisticra e d'electronista; ils ambassadurs giuvens represchentan lur professiuns da tgira e d'assistenza ubain èn confisier u coiffeur. Lur tratg cuminaivel è quel ch'ellas ed els èn anc oz piunieras e piuniers en lur professiun. Lur motivs, lur experientschas e lur cussegls n'èn betg mo interessants per ils giuvenils, mabain er per persunas d'instrucziun e per geniturs.


Remartga:
Collavuraturas e collavuraturs da las medias èn envidads da visitar il stan e la lounge da la tscherna da professiun dal post da stab per l'egualitad da las schanzas durant la fiera da tscherna da professiun FIUTSCHER en la halla da la citad da Cuira (directamain a l'entrada). Las ambassaduras ed ils ambassadurs sco er la manadra dal post da stab, Silvia Hofmann, stattan a disposiziun per intervistas.
Infurmaziuns davart la fiera sut www.fiutscher.ch  


Infurmaziuns:
Silvia Hofmann, manadra dal post da stab per l'egualitad da las schanzas, tel. 081 257 35 71, e-mail Silvia.Hofmann@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas