Malgrà ch'igl ha dà damain candidatas e candidats als examens d'admissiun da quest onn han quasi tuttina bleras scolaras e scolars sco l'onn precedent fatg il sigl en ina scola media grischuna. 

Tut en tut 732 (2014: 830) scolaras e scolars èn sa participads il favrer ed il mars da quest onn als examens d'admissiun per cumenzar il gimnasi da lunga u da curta durada sco er la scola media spezialisada e commerziala. Quai èn stgars 100 candidatas e candidats damain che l'on passà. L'examen per il gimnasi da lunga durada è stà pertutgà da questa diminuziun en la medema dimensiun sco l'examen unifitgà per il gimnasi da curta durada respectivamain per la scola media spezialisada e commerziala.

Da las 337 (2014: 382) scolaras e scolars primars che han absolvì ils 10 da favrer 2015 in examen d'admissiun per la 1. classa dal gimnasi da lunga durada, han 227 (2014: 238) fatg quel cun success.

Ils 17 da mars 2015 ha gì lieu l'examen unifitgà, al qual èn sa participadas 395 (2014: 448) scolaras e scolars. Da quels han 188 (2014: 190) ademplì ils criteris d'admissiun per l'entrada en la 3. classa gimnasiala. Ulteriuras 116 (2014: 115) scolaras e scolars èn sa qualifitgads per l'entrada en la 1. classa da la scola media spezialisada u commerziala.

Uschia han 531 giuvenils (2014: 543) reussì l'examen d'admissiun per l'entrada en ina scola media grischuna. La quota da success è superiura a quella da l'onn passà. Quai fa presumar che las candidatas ed ils candidats eran bain preparads per ils examens d'admissiun. 


Infurmaziuns:
Regina Just Brodbeck, uffizi per la furmaziun media-superiura, manadra da la partiziun "scolas medias", tel. 081 257 61 69 


Gremi: uffizi per la furmaziun media-superiura
Funtauna: rg uffizi per la furmaziun media-superiura