La regenza grischuna ha deliberà la missiva per la revisiun totala da la lescha davart il svilup economic (LSE) per mauns dal cussegl grond. Ils accents da la revisiun èn la futura promoziun da l'innovaziun e dal turissem sco er il svilup regiunal. La finamira è quella d'augmentar la valurisaziun sco er da garantir las plazzas da lavur existentas e da stgaffir novas plazzas da lavur.
Gia l'onn 2012 aveva la regenza inizià ina revisiun totala da la lescha per promover il svilup economic en il chantun Grischun (lescha davart il svilup economic, LSE) e dà en consultaziun in sboz da lescha correspundent. Cun acceptar l'incumbensa Caduff la primavaira 2014 ha il cussegl grond pretendì d'interrumper la revisiun totala da la LSE. La regenza ha pia suspendì la revisiun ed elavurà il rapport "Svilup economic en il chantun Grischun". Quest rapport cuntegna ina vista cumplessiva dal svilup economic dal chantun Grischun.
Il chantun promova il svilup economic en il Grischun cun la finamira d'augmentar la cumpetitivitad e l'innovaziun sco er la valurisaziun e pia da segirar las plazzas da lavur existentas e da stgaffir novas plazzas da lavur. Ils projects ston esser da gronda impurtanza per l'economia publica, per vegnir considerads sco degns da promoziun. Uschia èn l'augment da la valurisaziun e la creaziun resp. il mantegniment da plazzas da lavur criteris che furman la basa per mintga activitad da promoziun.
La promoziun tras il chantun en il rom da la LSE duai cumpigliar en emprima lingia ils secturs innovaziun, svilup da l'economia locala e turissem. In element impurtant da las futuras mesiras da promoziun cumpiglia la garanzia da bains immobigliars tras la regenza. Areguard il Grischun sco lieu da furmaziun e da perscrutaziun è centrala cunzunt la colliaziun en ina rait da la perscrutaziun, da l'instrucziun e da l'economia. Ils servetschs per interpresas gia domiciliadas e per interpresas che vulan sa domiciliar al lieu vegnan optimads tras la creaziun d'in post da contact central che recepescha lur giavischs, che coordinescha internamain ils scleriments e che defenda tut en tut la tenuta dal chantun.
Cun ina limita temporala vegnan mess a disposiziun – en la furma d'in credit d'impegn general – meds finanzials per promover projects d'infrastructura. Quai dat impuls impurtants al svilup da bleras valladas. Ulteriurs instruments previs en la LSE, sco per exempel la concessiun da garanzias per interpresas, duain cunzunt gidar a rinforzar il spazi rural. Il chantun sustegna las vischnancas e las regiuns en lur stentas per rinforzar ils centers e per crear cundiziuns generalas favuraivlas per l'economia.
Divergentamain da la lescha vertenta duai en il futur vegnir desistì d'ina promoziun d'interpresas singulas pitschnas e mesaunas en il sectur industrial ed artisanal. La regenza resguarda uschia la decisiun ch'il cussegl grond ha prendì en chaussa a chaschun da la debatta concernent il rapport davart il svilup economic.
La vasta activitad da promoziun d'enfin ussa da la fundaziun per innovaziun, svilup e perscrutaziun dal Grischun duai avair lieu sin basa da l'artitgel "projects innovativs" previs en il rom da la revisiun totala da la lescha davart il svilup economic. Uschia vegnan en il futur promovids interpresas giuvnas e start-ups da tecnologia. La regenza desista da dumandar al cussegl grond d'augmentar la facultad da fundaziun. La rait ch'è resultada tras l'activitad da la fundaziun duai vegnir tgirada er vinavant tras in barat d'experientschas regular ed eventualmain tras in giudicament cuminaivel da projects en cas singuls.
Il cussegl grond vegn a tractar la fatschenta en la sessiun d'avust 2015.
Infurmaziuns:
cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01,
Jondomenic.Parolini@dvs.gr.ch
Gremi: regenza
Funtauna: rg chanzlia chantunala dal Grischun