En il chantun Grischun datti ina diversitad remartgabla da bains culturals audiovisuals, sco documents da film e da tun, che n'èn betg cataloghisads fin ussa. Sco perditgas e regurdientschas impurtantas da l'istorgia grischuna vegnan questas materialias preparadas da la biblioteca chantunala dal Grischun en moda professiunala e rendidas accessiblas ad ina vasta publicitad en in portal da medias.
En la collecziun ed en la cataloghisaziun da reticas ha la biblioteca chantunala dal Grischun mess fin ussa il focus en emprima lingia sin publicaziuns, scrittiras e cudeschs. Il punct central da svilup "Diversitad culturala e linguistica" en il program da la regenza 2013-2016 permetta da prender suenter lavur en quest sectur ed uschia da render accessiblas las medias audiovisualas en in portal ad ina vasta publicitad.
La conservaziun e la tgira dal patrimoni e da la memoria culturala dal chantun Grischun cumpiglia er documents da film e da tun. Perquai che quests purtaders da datas èn periclitads pli e pli fitg en consequenza dal fatg ch'els sa laschan conservar mo limitadamain e perquai ch'igl è pli e pli difficil da chattar apparats da reproducziun che funcziuneschan, èsi inditgà da prender mesiras immediatas. Quest project ha la finamira da registrar en in inventari central ils purtaders da films e da tuns d'ina relevanza istorica sco er da segirar ils documents tut tenor il grad da periclitaziun, d'als cataloghisar e da porscher ad ina vasta publicitad las infurmaziuns respectivas en in catalog che sa chatta sin in portal d'internet, e quai sco ulteriur servetsch da la biblioteca chantunala.
En quai che reguarda l'archivaziun da bains culturals audiovisuals è la Svizra en ina rolla da piunier. Cun Memoriav, l'uniun per il mantegniment dals bains culturals audiovisuals da la Svizra, ha ella prestà lavur fundamentala essenziala per segirar, cataloghisar, intermediar ed entretschar medias audiovisualas. Las medias audiovisualas dal Grischun èn vegnidas segiradas cun il grond sustegn da Memoriav.
Il nov portal da medias e las materialias audiovisualas ch'èn uschia accessiblas, èn perditgas e regurdientschas impurtantas da l'istorgia e da la cultura grischuna. Il portal da medias audiovisualas na po betg mo vegnir duvrà d'ina vasta publicitad, mabain po er vegnir applitgà en ils secturs scola, furmaziun, scienza, perscrutaziun ed animaziun da museums.
Il portal da medias audiovisualas dal Grischun po vegnir consultà sut l'adressa d'internet
http://AV-Medienportal.gr.ch. El vegn cumplettà cuntinuadamain cun purtaders da films e da tuns d'archivs culturals, da museums, d'instituziuns, da collecziunadras e collecziunaders sco er da persunas privatas.
Infurmaziuns:
- president da la regenza Martin Jäger, tel. 081 257 28 21, e-mail:
Martin.Jaeger@ekud.gr.ch
- Barbara Gabrielli, tel. 081 257 48 01, e-mail:
Barbara.Gabrielli@afk.gr.ch
Gremi: Uffizi da cultura / biblioteca chantunala dal Grischun
Funtauna: rg biblioteca chantunala dal Grischun