La regenza grischuna ha nominà Curdin Tuor sco nov manader da l'uffizi per la furmaziun professiunala. Tuor è responsabel per la direcziun generala da l'uffizi cun var 60 collavuraturas e collavuraturs.

La regenza grischuna ha tschernì Curdin Tuor da 33 onns sco nov manader d'uffizi. Actualmain è Tuor gestiunari dal center da furmaziun Surselva a Glion sco er – cun in pensum parzial – vicegestiunari da la regiun Surselva. Avant ses studi per il bachelor of science FHO en economia da manaschi a la scola auta da tecnica ed economia SATE è el stà chanzlist resp vicechanzlist en las vischnancas da Schlans e da Trun.

Curdin Tuor daventa successur da Rita Wiesendanger che va – suenter ses engaschament dad 14 onns sco manadra da l'uffizi – en pensiun per la fin da schaner 2017.

L'uffizi per la furmaziun professiunala è cumpetent per tut las dumondas da la furmaziun fundamentala professiunala, cumpiglia ils secturs cussegliaziun da professiun, da studi e da carriera, surveglianza da la furmaziun professiunala, cussegliaziun da scola professiunala sco er l'atelier d'emprendissadi per la creaziun da vestgadira e subvenziunescha differents furniturs da prestaziuns.

Fotografia agiuntada:

 

Curdin Tuor


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch


Gremi: regenza
Funtauna: rg chanzlia chantunala dal Grischun