La biblioteca chantunala dal Grischun ha survegnì da l'archiv cultural dal Partenz (KAP) la collecziun dad Armanno Abeni che cumpiglia 240 films. Ils films ch'èn vegnids fatgs dals onns 1972 fin 2005 èn ina documentaziun unica da l'istorgia locala dal Partenz. Il material è accessibel sur il portal da medias audiovisualas dal Grischun.

Vers 15 kilometers films da super-8 e 40 cassettas VHS-C cumpiglia l'ovra extraordinaria dad Armanno Abeni. Oriund da l'Italia dal nord ha el vivì a partir da l'onn 1959 en il Partenz, nua ch'el ha, sper sia activitad sco manischunz da camiuns, conservà cun sia camera sin celluloid nundumbraivlas occurrenzas, festas e scenas da la natira da sia patria elegida. "Il filmader" ha elavurà posteriuramain il material da film, ha creà bunas transiziuns e sa preschenta en tscherts documents er sez.

L'onn 2005 è cumparì en la gasetta locala "Prättigauer und Herrschäftler" in purtret dad Armanno Abeni. Suenter la mort dal filmader l'onn 2006 ha la famiglia Abeni surdà il relasch filmic a l'incumbensada per la cultura dal Partenz Marietta Kobald che ha analisà e cataloghisà l'inventari. Cun sustegn finanzial da l'anteriur patrun da blers onns dad Abeni ha ella laschà digitalisar in'emprima part. Las digitalisaziuns èn vegnidas surdadas a las vischnancas da l'intschess filmà e preschentadas al public en blers lieus. Ils originals èn vegnids surdads a l'archiv cultural dal Partenz a Grüsch sco donaziun da la famiglia Abeni. Quel als dat ussa vinavant a la biblioteca chantunala dal Grischun, nua ch'els pon vegnir archivads a lunga vista.

Portal da medias audiovisualas dal Grischun
En il rom dal punct central da svilup "diversitad culturala e linguistica" dal chantun Grischun ha er anc il rest dals films dad Abeni pudì vegnir digitalisà. Ussa è tut il material cataloghisà en il portal da medias audiovisualas dal Grischun e po bainbaud vegnir visualisà en la biblioteca chantunala. Sur il portal da medias audiovisualas dal Grischun pon documents da film e da tun dal chantun vegnir salvads, digitalisads e rendids accessibels a la publicitad. Possessuras e possessurs da tals stgazis betg anc scuvrids èn supplitgads d'entrar en contact cun la biblioteca chantunala dal Grischun.

Ulteriuras infurmaziuns: portal da medias audiovisualas dal Grischun

Fotografia agiuntada: Armanno Abeni


Infurmaziuns:
Petronella Däscher, manadra da la biblioteca chantunala dal Grischun, tel: 081 257 28 21, e-mail: Petronella.Daescher@kbg.gr.ch


Gremi: uffizi da cultura
Funtauna: rg uffizi da cultura