Las elecziuns dal cussegl naziunal han lieu mintga quatter onns la segund ultima dumengia d'october. Il termin per l'elecziun da renovaziun dal cussegl naziunal per la perioda d'uffizi da quatter onns, che cumenza cun la sessiun d'enviern 2011, è dumengia, ils 23 d'october 2011. Ils tschintg mandats en il cussegl naziunal dal chantun Grischun vegnan surdads tenor la procedura electorala da proporz. Il dretg d'eleger han quellas persunas che han il dretg da votar. Elegiblas resp. elegibels èn las candidatas ed il candidats che figureschan sin las glistas. Per las elecziuns dal cussegl naziunal en il chantun Grischun valan ils suandants termins:
 

• Emprim termin pussaivel per inoltrar propostas electoralas: 23 da matg 2011
• Ultim termin per inoltrar propostas electoralas (ston arrivar fin il pli tard las 18.00 tar la chanzlia chantunala): 5 da settember 2011
• Ultim di per midar da las glistas inoltradas: 12 da settember 2011
• Ultim di per explitgar colliaziuns da glistas: 12 da settember 2011
• Publicaziun da las propostas electoralas: 15 da settember 2011
• Elecziuns dal cussegl naziunal: 23 d'october 2011

 

Quests termins ed ulteriuras infurmaziuns èn vegnids publitgads en il fegl uffizial dal chantun dals 6 da schaner. Formulars per l'inoltraziun da las propostas electoralas pon vegnir retratgs tar la chanzlia chantunala.

Nova regulaziun da la numeraziun da las glistas
En il chantun Grischun è vegnida reglada da nov la numeraziun da las glistas da las elecziuns dal cussegl naziunal. Per consequenza n'è betg pli la fermezza da las partidas u da las organisaziuns a chaschun da las ultimas elecziuns decisiva per la numeraziun, mabain da nov la successiun, en la quala las glistas electoralas vegnan inoltradas. Sche pliras glistas electoralas vegnan inoltradas il medem di, decida la sort davart la numeraziun. La regenza grischuna ha concludì ina revisiun parziala correspundenta da l'ordinaziun davart las elecziuns dal cussegl naziunal ed ha mess en vigur quella per il 1. da schaner 2011. 
 

Propostas electoralas inoltradas e numeraziun da las glistas