Settember 2023 Dieta davart il traffic betg motorisà dals 6 d’october a Cuira Venderdi, ils 6 d’october 2023 envida l’Uffizi da construcziun bassa dal Grischun sco post spezialisà per il traffic betg motorisà a la dieta annuala. Quest onn tractan ils temas la midada ed il futur dal traffic betg motorisà. Infurmaziuns davart la basa legala duain eliminar malsegirtads giuridicas. Projects sco E-tuktuk transport da giasts a Mustér e Sankt Pedalo cargovelos electrics dattan sper las visiuns davart velos da citad electrics ina invista en la mobilitad dal futur. En pli vegnan preschantads concepts da realisaziun concrets davart la midada dal traffic e dà updates interessants en ils projects currents da traffic betg motorisà en Grischun. Curts projects da Pitch mainan variaziun en il program ed en il discurs al podi vegnan discutadas las sfidas da la mobilitad creschenta. Sper il program infurmativ dattan las pausas da networking tranteren la pussaivladad d’in barat relevant tranter ils participants. Vus As lessas laschar inspirar da referats interessants, intervistas e discurs al podi? Alura S’annunziai anc oz per la dieta davart il traffic betg motorisà! Infurmaziuns davart il program e l’annunzia chattais Vus sin la pagina d’internet. 18avel di da viandar en Grischun Gia per 18avla giada organiseschan las Sendas grischunas dumengia, ils 24 da settember il di da viandar en Grischun. Envidar envida quest onn la regiun da vacanzas Planeiras (Lai). Sco adina sa preschenta il program da viandar en furma d’ina schelta captivanta d’excursiuns las pli differentas. Da la spassegiada simpla da plaschair a l’ascensiun d’in piz che fa suar datti per mintga gust la tura adattada, sco adina manada cumpetentamain ed accumpagnada da la gruppa da manaders d’excursiuns da las Sendas grischunas. Il di da viandar è avert per mintgin e gratuit er per quels che n’èn betg commembers. Tut las turas mainan al Lai da Planeiras, nua che la destinaziun da vacanzas offra a tuts ina buna marenda. Ulteriuras infurmaziuns chatt’ins sin la pagina d’internet da las Sendas grischunas. Per Voss sustegn cun infurmar davart il di da viandar essan nus engraziaivels. Trofea da viandar 2023 La trofea da viandar 2023 è in project da cooperaziun da las trais organisaziuns per sendas da viandar chantunalas da Turitg, Son Gagl e Grischun. En mintga chantun spetgan 15 bellas excursiuns da trofea da vegnir scuvertas ed enchaminadas en il rom da la trofea da viandar 2023. Sendas grischunas ha elegì las 15 excursiuns da trofea repartidas en l’entir chantun ensemen cun las organisaziuns da turissem regiunalas. Tut las turas chatt’ins online sin la pagina d’internet da la trofea da viandar (Wandertrophy-Website). Las finamiras pon vegnir legidas simplamain cun il scanner da Smartphone via code da QR e l’arriv registrà digitalmain. Tgi ch’ha absolvì cun success almain tschintg excursiuns, sa participescha a la fin da la stagiun automaticamain a la concurrenza cun premis attractivs. Sch’ina arrivada da la trofea sa chatta en Vossa regiun, fiss quai bain in bun motiv per derasar infurmaziuns davart la trofea da viandar en Voss chanals. Grazia fitgun! Renconuscher ussa il manifest per la muntogna Il manifest grischun per la muntogna è l’expressiun d’ina relaziun plain respect cun lasmuntognas grischunas. Var 2300 persunas han fin ussa renconuschì ils 10 tips da deportament en il manifest per la muntogna. Cun reglas simplas protegin nus la natira e guardain che mintgin haja plazza sin las vias ed ils trails en muntogna. Il manifest grischun per la muntogna è in’iniziativa da Grischun Vacanzas per in turissem pli persistent. Tgi che vuless sustegnair l’iniziativa sin ses agens chanals po duvrar ils elements correspundents da communicaziun sut: Bergmanifest. La pagina da landing che duai vegnir communitgada è buendner-bergmanifest.ch. Carta da cursas da trail en il Parc natiral Beverin La carta da cursas da trail en il Parc natiral Beverin ch’è vegnida elavurada pretensiusamain ils davos mais cumpiglia 28 propostas da turas da highlight da Val sur la Val Stussavgia fin en la regiun da la Viamala. La rait uffiziala da sendas da viandar, fermadas dal bus, telefericas ed er pussaivladads d’alimentaziun cumpletteschan questa carta plegabla cumpacta. Cun agid dals codes da QR pon ins clamar giu infurmaziuns cuntinuantas a las turas, dal profil d’autezza fin a las datas da GPX. Uschia pon ins cumbinar la planisaziun da rutas da cursas da trail analoga e digitala. La carta è vegnida realisada en stretga collavuraziun da graubünden Trailrun ed il Parc natiral Beverin sco er da la vischnanca da Valragn e cun sustegn da las trais organisaziuns turisticas da Val, Val Stussavgia e Viamala. Tut las infurmaziuns relevantas davart il project cartografic vegnan cumpigliadas actualmain en in mussavia e communitgadas proximamain sin la pagina d’internet «graubuendentrailrun.ch». Tgi ch’ha interess d’ina carta da cursas da trail sumeglianta, po gugent s’annunziar tar la firma Firma Zenit run (info@zenit.run / +41 81 330 09 19). Intervegnir dapli: naturpark-beverin.ch/de/trailrunning Curs unitars per las persunas che mantegnan ils trails per velos da muntogna graubünden Bike porscha a tut ils Grischuns che pisseran per il mantegniment dals trails per velos da muntogna en il chantun Grischun la pussaivladad da sa participar ad ina scolaziun unitara per tut la Svizra. Ils curs vegnan fatgs e sustegnids en il rom dal project da promoziun graubünden Bike per garantir ina qualitad permanenta e la segirtad dals trails e las rutas da velo en tut las regiuns. En collavuraziun cun la fundaziun naziunala Trail.Foundation han spezialists da plirs chantuns sviluppà la nova scolaziun. Suenter l’emprim curs da pilot da quest atun, duain ils curs vegnir offerts fin 2026. Il curs da pilot ha lieu dals 9 als 11 d’october a Lai. Ulteriuras infurmaziuns davart il cuntegn dal curs ed il formular d’annunzia chattais Vus qua. Il dumber da plazzas è limità. Per ulteriuras infurmaziuns e per dumondas stat la direcziun dal project, Christa Häberlin, gugent a disposiziun per e-mail. Repassada da la rait da vias Vias e sendas da viandar tutgan tar il chapital turistic da noss chantun sco la cuntrada incumparabla. Quai vesan er las vischnancas grischunas uschia ed han signalisà ina rait da vias e sendas da viandar correspundenta. Cun las sendas da viandar èsi dentant sco cun mintga offerta turistica: I sto vegnir controllà qua e là, sche tut correspunda anc a las pretensiuns dals giasts. Èn ils puncts attractivs relevants per la valur agiuntada integrads èn la rait da vias e sendas? Èn las vias memia pretensiusas u forsa memia facilas per ils segments da giasts, als quals ellas sa drizzan? L’Uffizi da construcziun bassa sco post spezialisà per il traffic betg motorisà ha fatg in mussavia che duai gidar las vischnancas a controllar lur entira rait da sendas da viandar. Quel propona da proceder pass per pass e simplifitgescha la planisaziun d’ina tala examinaziun. Il mussavia è disponibel en las trais linguas chantunalas. Savevas Vus gia che…? 97 pertschient da tut ils abitants en Svizra vivan main che tschintg kilometers davent d’ina staziun - e cun quai en ina distanza ideala per velos. Quai mussan datas da l’Uffizi federal da statistica e l’Uffizi per il svilup dal territori. Posts da staziunament da velos gronds avunda, segirs e plazzads optimalmain a las staziuns èn pia impurtants, sch’il traffic da pendularis motorisà duai vegnir reducì e spostà sin la viafier. L’Uffizi federal da vias metta a disposiziun in mussavia correspundent cun recumandaziuns per la planisaziun e la realisaziun da staziuns per velos. Uffizi da construcziun bassa, Servetsch per il traffic betg motorisà Loëstrasse 14, CH-7001 Chur flv@tba.gr.ch  •  Pagina-web © 2023 Uffizi da construcziun bassa, Servetsch per il traffic betg motorisà. Tut ils dretgs resalvads.

In Shared Service da Graubünden Ferien