Las structuras da la segirezza interna da la Svizra ston vegnir examinadas. Partend dal princip federalistic èn las furmas da collavuraziun da definir da nov sur ils cunfins dals chantuns e cun la confederaziun. Davart questa dumonda èn vegnids inoltrads differents projects tar la confederaziun e tar ils chantuns. La conferenza dals cumandants da las polizias chantunalas da la Svizra (CCPCS) è s’occupada a basa d’ina skizza da visiun medemamain da questa tematica a chaschun da la conferenza annuala dals 15 e 16 da settember 1999 a Schaffusa. Enstagl dal president da fin uss, Markus Reinhardt, cumandant da la polizia chantunala dal Grischun, ha la conferenza tschernì tenor turnus Pierre Aepli, cumandant da la polizia chantunala dal Vad sco ses nov president per trais onns.
Per accumplir las incumbensas odiernas da la polizia èsi necessari che la confederaziun stgaffeschia sin stgalim naziunal las premissas per pudair metter spert e professiunalmain las prioritads polizialas. Il succurs da l’armada che sa basa sin il princip da solidaritad na dastga betg daventar il cas regular. Plinavant pretenda la conferenza dals cumandants da las polizias chantunalas da la Svizra l’adattaziun da la basa legala necessaria persuenter sco er soluziuns coordinadas sin il sectur da la transmissiun e da l’informatica.
La conferenza dals cumandants da las polizias chantunalas da la Svizra è s’occupada sut il presidi da Markus Reinhardt er da las provocaziuns polizialas ed operativas da la problematica dal millenni e da la realisaziun d‘intensivar las controllas dal traffic pesant, in fatg che na vegn medemamain strusch ad esser realisabel senza agid federal, tegnend quint dals effectivs dals singuls corps da polizia. La conferenza ha er sa laschada infurmar davart il project per l’autopreschentaziun a la Expo.01 en il rom dal project federal “Segirezza en l’avertadad” ed ha fixà ils proxims pass persuenter. Ella è er s’occupada cun la scolaziun da sias collavuraturas e da ses e collavuraturs concernent ils dretgs umans e las libertads fundamentalas ed ha preschentà la nova homepage d’internet da la polizia svizra www.swisspolice.ch. Uschia pon vegnir derasadas persecuziun ed intents da prevenziun a moda cunvegnenta en l’entira Svizra. Las dunnas tar la polizia e la lavur parziala tar ils corps da polizia èn er stadas temas sin la glista da tractandas. Davart questas dumondas han referì represchentantas da l’uniun svizra da las impiegadas da polizia criminala e da segirezza (USIPCS). La conferenza ha er sa laschada infurmar davart il concept directiv da la telematica dal traffic sin via dal futur ed ha approvà la reorganisaziun da sia cumissiun tecnica da polizia (CTPS), ch’è responsabla per l’evaluaziun sin il sectur tecnic.
En ses davos rapport annual ha il president partent accentuà che l’architectura futura da la segirezza interna stoppia vegnir tractada prioritarmain ils proxims onns da la conferenza. Ella sappia dentant vegnir realisada be alur cun success, sche la discussiun vegn coordinada en collavuraziun cun ils partenaris da la CCPCS sin stgalim federal e chantunal.
Quelle: Kantonspolizei Graubünden