Cun l'engaschament dad otg langeghers ha cumenzà l'istorgia da la polizia chantunala grischuna l'onn 1804. En connex cun las festivitads dal giubileum da 200 onns vegn la populaziun envidada cordialmain da passentar in di da las portas avertas tar ils posts da polizia en tut las tschintg regiuns. Cun demonstraziuns attractivas d'unitads spezialas, cun ina preschentaziun cun blers maletgs d'eveniments vegls e novs da l'istorgia da 200 onns e cun scuntradas persunalas vegnan mussadas las incumbensas multifaras da la polizia moderna da l'onn 2004.

Cun resguard da la situaziun finanziala critica han lieu las festivitads da giubileum en in rom fitg modest. Per las collavuraturas ed ils collavuraturs da la polizia chantunala e per paucs giasts envidads vegn organisà in apero cun pleds festivs e represchentaziuns da la musica da polizia e dal chor viril da polizia. L'onn da giubileum 2004 porscha surtut ina pussaivladad bainvegnida da mussar a la populaziun pli precisamain las regiuns da polizia stgaffidas da nov. Dapi il cumenzament da quest onn è en vigur la reorganisaziun totala da la polizia chantunala, cun novas structuras vegni ussa lavurà en las regiuns Rain, Surselva, Mesolcina, Engiadina e Grischun central tenor il motto: "ina regiun – in schef – ina incumbensa". La proximitad al burgais, il sentiment da segirezza e la confidenza en la polizia duain uschia vegnir rinforzads.

Las burgaisas ed ils burgais èn en il center
En il center dal giubileum stat la burgaisa, il burgais. Per ellas ed els tuts è planisà durant l'onn da giubileum in di da las portas avertas tar tut ils posts da polizia grischuns. Grenadiers vegnan a demonstrar lur acziuns spectacularas cun elicopters, chauns da servetsch pon vegnir observads tar controllas da persunas e da vehichels, preschentaziuns cun chauns da drogas e cun ina valisch da drogas vegnan ad intermediar ina savida impurtanta davart meds narcotics, acziuns ed equipament dals sfunsaders e dal servetsch d'urden vegnan declerads. Contemplar ina giada ina cella da dadens, guardar in vehichel da polizia da dadens e da dadora, persequitar da dastrusch la segirada d'indizis e laschar sa prender improntas dal det: durant il di da las portas avertas pon las burgaisas ed ils burgais observar la lavur da polizist da dastrusch e laschar s'infurmar detagliadamain.

Maletgs dad ier e dad oz
Fotografias da temps passads e documents actuals èn vegnids rimnads per ina preschentaziun da powerpoint. Persunas interessadas pon contemplar a bainplaschair quests maletgs d'antruras e dad oz tar ils singuls posts da polizia.
En quest connex sa mussa cleramain la midada dal temp en blers secturs: tar il svilup tecnic gist uschè bain sco per exempel tar il fatg che er dunnas prestan servetsch tar la polizia, e quai dapi stgars 30 onns. Ils programs detagliads davart ils dis da las portas avertas en las singulas regiuns vegnan publitgads a temp en las medias localas.

Dis da las portas avertas
regiun Surselva: sonda, ils 15 da matg 2004: posts da polizia da Glion, Flem e Mustér
regiun Rain: sonda, ils 5 da zercladur 2004: posts da polizia da Landquart, Domat, Tusaun, Andeer ed Arosa sco er basas da la polizia da traffic da Cuira e da Tusaun
regiun Mesolcina: sonda, ils 12 da zercladur 2004: posts da polizia da Grono, Mesocco e Spleia sco er la basa da la polizia da traffic da San Bernardin
regiun Engiadina: sonda, ils 28 d'avust 2004: posts da polizia da San Murezzan, Silvaplauna, Samedan, Puntraschigna, Castasegna, Poschiavo, Campocologno, Zernez, Scuol, Martina, Samignun, Sta. Maria V.M. sco er basa da la polizia da traffic da Silvaplauna
regiun Grischun central: sonda, ils 23 d'october 2004: posts da polizia da Schiers, Küblis, Claustra, Tavau, Savognin, Lai, Casti, Filisur

Quelle: polizia chantunala grischuna