Il dumber dals acts chastiabels e dals accidents da traffic è sa diminuì levamain
Il dumber dals acts chastiabels e dals accidents da traffic en il chantun Grischun è sa diminuì levamain l'onn 2004. Quai mussa la statistica criminala e dals accidents da traffic 2004 ch'è vegnida preschentada da la polizia chantunala grischuna il venderdi ad ina conferenza da medias a Cuira. Il dumber total d'acts chastiabels è sa diminuì per 2.7 pertschient a 9’855 cas (10’125 cas l’onn 2003). Tar 2'642 accidents da traffic (2'675 l'onn precedent) han 25 persunas pers la vita, 917 persunas (1'005 l'onn 2003) èn vegnidas blessadas.

"Las cifras da la polizia criminala sa stabiliseschan sin in nivel aut. Las valurs da la polizia da traffic restan da princip constantas, cun excepziun d'in ulteriur augment d'accidents mortals da motos", ha declerà il cumandant da la polizia Markus Reinhardt. Ins possia adina puspè constatar ch'il sentiment da segirezza da la populaziun na correspundia betg a las valurs statisticas. "La tema da daventar la victima d'in act criminal u d'in accident da traffic daventa – visavi il svilup real – pli e pli gronda." L'enguladitsch brutal d'ina tastga da maun chaschunia dapli malsegirezza che la criminalitad economica che n'è strusch conscienta a la populaziun. La prontadad da duvrar violenza reduceschia il sentiment da segirezza, schebain ch'il svilup da la criminalitad restia tut en tut stabil.

11 motociclists blessads mortalmain
Robert Willi, schef da la polizia da regiuns e da traffic ha discurrì d'ina "bilantscha critica" en connex cun las motociclistas ed ils motociclists ch'èn vegnids blessads mortalmain. Da las totalmain 25 victimas mortalas en accidents da traffic (onn precedent 25) èn stadas 11 (7) motociclists e cunmotociclists en la vegliadetgna da 20 fin 69 onns. Per fortuna ha pudì vegnir registrà in dumber regressiv d'uffants blessads (49 pertschient) en il traffic sin via
La gronda part dals accidents da traffic èn capitads durant la fin d'emna. Ils pli frequents èn puspè stads accidents da glischnar resp. accidents persunals pervia d'inattenziun, nunadattaziun da la sveltezza e distracziun. En la citad da Cuira èn succedidas fitg bleras collisiuns da davos ed accidents cun midar direcziun. L'onn 2004 hai dà ils emprims accidents cun portgs selvadis en il Grischun.

Blers ladernitschs ord tastga
"Il dumber total dals acts chastiabels è sa reducì levamain l'onn 2004 cumpareglià cun l'onn precedent. El sa preschenta però anc adina sin il nivel il segund aut dapi l'onn 1996", ha explitgà Gianfranco Albertini, schef da la polizia criminala. 3'564 acts chastiabels han pudì vegnir sclerids. Quai correspunda ad ina quota da 36 pertschient (onn precedent 34 pertschient). Als acts chastiabels sclerids èn stadas participadas 1'967 persunas svizras e 1'353 persunas estras.
La polizia chantunala ha retschertgà l'onn 2004 en 106 (onn precedent 85) mortoris extraordinaris, tranter quels 41 (23) suicidis sco er 14 (12) accidents da muntogna, 3 (6) da lavina, 1 (5) da lavur, 7 (4) da sgol, 6 (4) da skis ed 1 (2) da bogn. Morts da drogas han ins stuì registrar 2 (2). Trais emprovas d'omicidi han pudì vegnir scleridas l'onn 2004.
En cas dals delicts sexuals han ins stuì registrar 10 violaziuns (onn precedent 10), 17 (8) acts sexuals cun uffants e 4 (4) constricziuns sexualas. In cler augment han ins stuì constatar tar ils delicts da libertad (smanatscha, constricziun, violaziun da domicil, privaziun da la libertad) cun 111 (onn precedent 89) cas. Dals 98 incendis (onn precedent 91) èn vegnids sclerids 34 cas. Tar 19 cas d'incendi sa tractavi d'in incendiament.
Il dumber d’infracziuns sa chatta cun 754 cas in pau sur quel da l'onn precedent (726). Entant ch'ins ha pudì constatar ina clera diminuziun tar ils delicts da rapiment e d'engion, è il dumber dals ladernitschs ord tastga s'augmentà da 270 sin 462 cas.
La statistica da narcotics mussa vinavant in augment da las cuntravenziuns cunter la lescha da narcotics da 967 a 1'518 denunzias. Las denunzias tar il commerzi cun cannabis e cun cocain èn s'augmentadas marcantamain. Quai po vegnir attribuì a la pratica repressiva. Il commerzi cun heroin sa chatta sin il nivel da l'onn precedent.

La statistica criminala detagliada 2004 po vegnir consultada en l'internet sut www.kapo.ch.

Quelle: polizia chantunala grischuna